Nongpoh, Rymphang 20: Ka jingkhlad ba kyndit u Dr. Ricky AJ Syngkon, Member of Parliament ka Voice of the People Party (VPP), uba la khlad noh hynnin ka miet, kam dei tang ba ka la pynkyndit ia ki paidbah ha ka jylla, hynrei ka la pynkyndit wat ia ki nongialam ba hakhlieh ka ri, kata kaba kynthup naduh u Narendra Modi, Myntri Rangbahduh ka ri, nangta u Rahul Gandhi, nongialam ka liang pyrshah ha Lok Sabha lem bad kiwei de ki para MP ha Lok Sabha.

Halor ka jingkhlad u Dr. Ricky AJ Syngkon, naduh u Narendra Modi bad Rahul Gandhi, lyngba ka jingthoh jong ki ha ka X, ki la pynpaw ba ka jingkhlad jong u, ka dei ka jingduhnong ba khraw bad kiba la pynpaw ruh, ba ia ka kyrteng jong u yn iai kynmaw halor ka kam kaba u trei na bynta ban shakri ia ki paidbah ha ka jylla Meghalaya.

Ha ka jingthoh jong ki, ki la phah ruh ia ka kyrwoh khubor sngewlem sha kiba haiing, kiba ieid ba thoin, ki paralok lem bad ki nongkyrshan, ai ba ka mynsiem jong u Dr. Ricky AJ Syngkon kan shongthait shijunom ha ka jingsuk.