Shillong, Rymphang 27: U wei u dkhot ka Hynniewtrep National Liberation Council (HNLC), kaba dei ka seng kieng atiar bala shah kheiñ beaiñ u la leit ban pyndem wait hakhmat u Superintendent of Police ka Eastern West Khasi Hills District hynnin ka sngi Palei.
Katkum ka jingtip bala ioh lum la ong ba utei u dkhot bala pyndem wait u dei ruh u Area Commander katei ka seng kieng atiar na West Khasi Hills bad hadien ka jingpyndem wait la rah noh ïa u sha ophis ka Director General of Police sha Shillong bad ïaka jinglong jingman ki pulit ki dang buhrieh, namar ki dang pynlong ka jingtohkit bad suba ba ki don shibun ki kam ba seng ka leh bad ki briew kiba donkti, ha kaba ki ophisar pulit kim pat lah ban pynpaw pyrthei namar ka lah ban ktah ïaka jingtohkit jong ki.
Shuh shuh la ioh jingtip ruh ha ka jingkhynra kaba ïadei bad kane, ki pulit ki la kem ruh a arngut ki briew kiba la kynnoh ba ki donkti ha ka jingthmu ban pynbthei bom ha Umsning, Ri-Bhoi.
