Nongpoh, Iaiong 04:  U Bah Jedwin Lyngdoh kum u Rangbah Shnong barim ka Shnong Pahamsyiem bad uba la shah jied thymmai biang mynta ka sngi, u la ther tyngeh ba haba don ka jingjied ia ki nongialam shnong ha kano kano ka shnong, ngim dei ban pyndonkam da ka kyiad, ka pisa bad ka jingialap election ba kane ka ktah ia ka bha ka mait bad ka jingiatylli ki paidbah nongshong shnong hapoh ka shnong.

“ Haba nga la shah jied kum u rangbah shnong ba thymmai, nga la dei u rangbah shnong jong baroh ki nongshong shnong khlem da dei ban leh shiliang bad ban pyndonkam pat da ka kyiad, ka pisa bad ka jingialap ban pynsngewthuh bakla ia ki nongshong shnong ka dei ka kam kaba sniew tam bad kaba pynjot ia ka shnong ka thaw” ong u Bah Jedwein Lyngdoh.

Namarkata, u la bynrap ruh da kaba ong, haba don kano kano ka jingjied ia ki nongialam shnong ha kano kano ka shnong, ngi dei ban ailad ha ka jingstad jong ki nongshong shnong ban bishar ia une u briew uba ki angnud ban pynkup bor kum u nongialam Shnong, hynrei ban ong ban pyndonkam da ki buit thok ki buit shukor kane kan pynsniew dur ia ka bha ka miat bad ka roi ka par jong ka shnong ka thaw, u la bynrap.

Kum ban pynpaw, mynta ka sngi ki paidbah ki la jied ia ki nongialam shnong ba thymmai ka Shnong Pahamsyiem ba hap ha ka Raid Nongpoh, Elaka Nongpoh Sirdarship na ka bynta ka samoi treikam jong u snem 2026 haduh u snem 2029 bad ha kane ka jingjied thymmai ia ki nongialam shnong ki paidbah ki la ibit ia u Jedwin Lyngdoh ban shim biang ia ka lyngkor nongialam kum u Rangbah shnong bad la jied Assistant Rangbah Shnong ia u Bah Wanphrang Sumer, Secretary ia u Bah Alford Syiem bad Assistant Secretary ia u Bah Shanbok Syngkli.

Ha kane ka sngi la don ryngkat ruh ban sakhi naduh u Acting Sirdar ka Elaka Nongpoh Sirdarship u Bah Luistar Lyngdoh, u Lyngdoh ka Raid Nongpoh u Bah Linus Lyngdoh bad kumjuh ruh ki longsan ki mansan ka Raid bad ka Elaka, kiba la ai ka jingkhublei bad ka jingkitbork kitrwiang ia kine ki nongialam ba thymmai ba kin shm ia kata ka lyngkor nongialam na ka bynta ban tei ne pynbha ia ka shnong ka thaw.