Shillong, Lber 04:  Da ka mynsiem jong ka jingshlur bad ka mynsiem ban len lade ban kyrsiew thiah ia ki paradoh ki parasnam ne ki trai muluk  ki trai jaka ha ka jylla, ka Khasi Students Union mynta ka sngi ka la pynlong ia ka sngi Kyrsiew Ri lane kata ka Khasi National Awakening Day, da kaba iaid paidbah na Bharat Scouts and Guides, Laban bad pynkut ha Shillong Vidyalaya Secondary School, Lumshatsngi.

Kumba la sakhi ha kane ka sngi kyrsiew ri ka KSU, ha ka jaid paidbah la don ruh ka jingiakawang maw bad ba la jan mih ka huri hura, hynrei ki nongialam ka seng KSU bad kiwei kiwei ki seng kiba la iasnih kti lang kim shym la pyndep bad ki la iaid shaphrang ban pynlong ia kane ka sngi kaba jop kum kata ka sngi ba ki kyrsiew thiah ia la ki paradoh ki parasnam.

Ha  kane ka sngi nalor ka jingdon u President ka KSU u Samla Lambokstarwell Marngar bad ki nongialam ka sengkmie ka KSU, la wan ruh ban shim bynta ki nongialam naduh u Bah Samuel Jyrwa Chairman ka NESO, u Bah Sadon Blah Preisident ka HNYF, u Bah Eldie N. Lyngdoh General Secretary ka FKJGP, bad kisei kiwei ki nongialam seng bhalang bad ryngkat ki dkhot ka jaid bynriew naduh ki longkmie ki longkpa bad ki samla kiba la wan ban kyrshan ha kane ka sngi kyrsiew ri.

Ha kane ka sngi la ai jingkren ruh da u Samla Lambokstarwell Marngar kum u President ba rangbah ka KSU, uba la ban khia ia ki paradoh ki parasnam ne ki trai muluk ki trai jaka ban don ia ka jingiatylli, namar kumba long haduh mynta kum ka jaid bynriew ngi dang shah teh shah khum ha ki briew kiba nabar ba ka KSU ka dei tang ka nongkyrsiewthiah ia ki samla ba kin hap ban leh ei ei naka bynta ka jaid bynriew.

Haba sdang ban ai jingkren u Samla Marngar, u la kren ruh ba ngi long ki Khasi da ka snam bad ngi long ki nong India da kaba shah pynbor, da kaba kynmaw tympang ruh ia u Syiem Tirot Sing bad u Who Kiang Nongbah kiba iakhun pyrshah na ka jingthombor ka sorkar phareng bad wat u Mahatham Gandhi ruh um pat phohsniew, u la ong.

U la bynrap ruh da kaba ong ba bun ki briew ki la pyrshang ban pynsgewthuh bakla ba ka KSU ka shu kyrsiew ri beit man ka por bad u la pynshai ruh ba ka KSU ka kyrsiew ri, ka dei nanmar ba ka angnud ba ki dkhot ka jaid bynriew ki dei ban mih pyrthei na ka bynta ban iada ia ka ri bad ka jaid bynriew, ha kaba ban iada ia ka jaid bynriew ngi donkam ka jingtyli lang na baroh ki dkhot ka jaid bynriew, u la bynrap.