Nongpoh, Iaiong 04: Da ki hajar ngut ki khun ki hajar, ki raiot ka Raid Marngar ba hap ha ka Hima Mylliem bad kiwei ruh ki nongshnong na ka them Ri Bhoi ki la tuid ha kawei na ka jingleh niam tynrai ba la ju pynlong shisien shisnem lane ba la tip kum ka jingtongdoh paidbah ha katei ka pung jong ka Raid kaba don ha ka shnong Mawthlen Borkusi ha Ri Bhoi.

Ka jingtohdoh paidbah hapoh katei ka pung Raid ka dei ka jingtohdoh ba la shim bynta da ki khun ki hajar kiba shong katkum ka bok ka nusip bad ym tang kata ka jingtohdong paidbah bad kane ka dei kawei na ka jingleh niam tynrai ka Raid Marngar kaba long kum ka nguh ka dem blei ha ryngkat ki khun ki hajar.

Ha kane ka jingleh niam la shim bynta lang ruh naduh ki longsan ki mansan ka Raid bad ki heh jong ki kur ba don bynta ha ka lehniam lehrukom jong ka Raid, kaba dei ha ka jingialam u Syiem ka Raid u Paiem Richard Syiem.

Shuwa ban ailad ia ki khun ki hajar ban ia tong doh paidbah, la pyndep shuwa ia ka knia ka khriam bad ka nguh ka dem blei bad hadien kata la ailad ban tongdoh paidbah ha katei ka pung jong ka Raid.

Kumba la iathuh da u Syiem ka Raid Marngar u paiem Richard Syiem, la ong ba kane jingtongdoh paidbah ne ka lehniam ha katei ka pung, ka dei ka dei ka jingainguh a idem ia U Blei trai kynrad u nongbuh nongthaw,  nongsam bynta u nongbuh bynta ban bha ban miat, ban shaid ban khlain, ban biang ka synshar khaddar ka ri ka raid, ka it ka hima, kaba ainguh a idem ia ki blei kid ken, lei synshar, lei syngkien, lei duwar, ka lei longkur long jaid, ban im ha ka hot ka sor, ban tip ka akor ka burom, ban kamai ia ka hok, ha kaba ki longsan man san ryngkat u syiem ki ai ia kata ka nguh ka dem Blei hapoh katei ka Pung Raid.