Shillong, Ïaiong 6: Ka Voice of the People Party (VPP) ka la pynher syndon da ka jingthoh (Shithi) sha u Myntri Rangbahduh ka ri, u Narendra Modi, ban pynpaw ïa ka jingsngewkhia halor ka Foreign Contribution (Regulation) Act Amendment Bill, 2026, khamtam eh ïa ki kyndon kiba ailad ïa ka sorkar ban shimti ïa ki tiar bad jingïoh jong ki kynhun lane ki seng lada la weng noh ïa ka registration FCRA jong ki.

Ha ka shithi bala phah sha u Modi, u President ka VPP u Bah Ardent Miller Basaiawmoit u la ong ba ka seng ka sngewthuh ïa ka bynta jong ka sorkar ban pynthikna ïa ka jingkhuid jingsuba bad jingïada ïa ka ri, hynrei u la pynpaw ba katto katne ki bynta jong kane ka Bill ki lah ban wanrah jingma bad jingktah ïaki seng trei mon sngewbha.

Ka VPP ka la kdew ruh ba kiba bun ki kynhun treimon sngewbha kiba lah ban shah ktah, kynthup ïa ki kynhun seng Khristan, kiba  la trei hok la bun phew snem ha jylla Meghalaya kiba ai ka jingshakri kum ka pule puthi, ka koit ka khiah bad ka jingkyrshan ïa ki shnong nongkyndong kiba wan na ki longing longsem baduk ba kyrduh.

Kumta, ka VPP ka la kyrpad jur ïa ka sorkar pdeng ba kan bishar bniah biang ïa kine ki kyndon, ban pynthikna ba la da pynkylla ïa kata ka Foreign Contribution (Regulation) Act Amendment Bill, 2026 ka dei ban ïaid ryntih katkum ka aiñ, ban don ka jingïakren kyrpang khamtam ha ki jylla ka thaiñ shatei lam mihngi, bad ban buh ïa ki jingïada ïa ki kam jingïarap bad ki kam lehisynei kiba shisha bad kiba dei ki kam ban tei ïa la ka ri.

Naka liang u Bah Aredent u la bynrap ruh kum ka seng ka ngeit ba ka jingïada ïaka ri ka long kaba kongsan hynrei dei ruh ban burom bad ïada ruh ïaka jingnoh synniang jong ki seng trei mon sngewbha sha ka imlang ka sahlang.