Shillong, ïaïong 06: Kum uwei na u nongmihkhmat paidbah uba la shakri 30 snem na ka Pynthorumkrah Constituency, u Bah Alexander Lallo Hek mynta ka sngi u la ioh ban pdiang da kawei ka khusnam kyrpang ba la tip kum ka ‘AIMS Democratic Leadership Award 2026’ ha ka jingïalang ba la pynlong ha Constitutioinal Club ha Nongbah Dedlhi.

Ka kymhun Alliance of Intellectual Minds & Statesmen (AIMS), ka la ai ïa kane ka khusnam ïa u Bah Alexander Laloo Hek, ki dei halor ki synñiang ki bynhei kiba u la shakri kum uwei na u nongïalam ha ka jingshakri ha ki kam sain pyrthei hapoh ka jylla Meghalaya ba la kot sha ki 30 tylli ki snem jong ka jingshakri.

“Kane ka khusnam ba la ioh pdiang u Bah Alexander Laloo Hek ka phalang halor ki kam kiba u la shakri la bun phew snem kum uta u nongmihkhmat paidbah, ong ka kyrwoh na ki nongïalam ka State BJP ka jylla.

La ong ruh ba kane ka burom ba la ioh pdiang u Bah Alexander Laloo Hek ka paw shai kdar halor ka jingjop ka jong u, kaba u la shah jied kum u nongmihkhmat paidbah la bun phew snem bad ruh ba ka party BJP ka dei ka party kaba phai khmat kyrpang na ka bynta ka roi ka par hapoh ka jylla.

Ka AIMS ka la pynpaw shai ruh halor ka jinglong nongïalam u Bah Hek bad ruh ïa ka dor jong ka jingshakri ka BJP na ka bynta ka roi ka par bad ka jingioh jingshaniah na ki paidbah lyngba ka jingsynhsar kaba khuid ba suba ka BJP, bynrap ka kyrwoh.

Shuh shuh, ka BJP party ka la pynpaw ruh ba kane ka jingioh pdiang u Bah Hek ïa ka khusnam ka pynshlur ba un dang lah ban shakri kham bha ïa ki paidbah na ka bynta ban wan rah ïa kata ka jingkylla hapoh ka jylla.