“IENG SKHEM HALOR KA ILP BAD DAWA PYNTREIKAM ÏA KA MRSSA-2016 KATBA YM PAT TREIKAM KA ILP”

Nongpoh, Ïaïong 11: Ka Ri Bhoi Youth Federation (RBYF) Sengkmie kum kawei na ka seng trai ha Ri Bhoi District mynta ka sngi ka la pynlong syndon da ka General Council, ha kaba da ki hajar ngut ki nongïalam bad ki dkhot na Circle bad ki Zone ki la ïatuid sha kane ka jingïalangbah ba la pynlong ha Madan Pahamsyiem ha Ri Bhoi District.

Na ka liang ka seng ha kane ka General Council, ka la ai ïa ka kaidphod bapher bapher jong ka jingtreikam ka seng lyngba ki Committee naduh ki kam kiba ïa dei ban kyntiew ïa ka pule ka puthi, ki kam ïalehkai sport, ki kam ba seng ka pynkhlain ïa ka jingtreikam lyngba ka Political Committee, kiba ïa dei bad ka jinglut jingsep lem bd kiwei kiwei de ki kam ba la shakri da ka seng ha kane ka District.

Ha kane ka sngi la pynsngew ruh sha baroh ki nongïalam bad sha ki dkhot ka seng, ba ka seng ha ka jingïaid lynti kaba 46 snem naduh ba la seng ha u snem 1979, ka la ioh ïaka ophis treikam kaba pura ba la long trai hi da ka seng na ka bynta ban pynlong kum ka shlem ban saindur ïa ka jingshakri na ka bynta ka eh ka shon ki paidbah ha kane ka District bad wat ha ka jylla hi baroh kawei.

Shwa ban sdang ka General Council la pdiang sngewbha ruh ïa ki nongïalalam ka Sengkmie da ka put ka tem bad ka jingshat tynrai ban ïalam haduh ka jaka shong ki nongïalam bad la sdang pat ïa ki prokram bapher ryngkat ki jingrwai jong ka seng kiba pynum mynsiem ïa kitei ki nongïalam  bad ki dkhot ka seng.

Haba kren sha ki lad pathia khubor, U President ka RBYF U Bah Bipul thangkhiew, u la ong ba kane ka jingpynlong ïa ka general council, ka dei tang ban ai ïa ka kaiphod treikam jong ka seng sha ki nongïalam bad ki dkhot bad ka dei ruh ka jingïalang ba ka seng ka sngewsarong ba la don la ka jong ka ophis treikam ba la lah ban tei hadine ka jingïaid lynti kaba 46 snem jong ka jingshakri.

Kiwei kiwei ki mat kiba u la pynpaw lyngba kane ka jingïalang, ka long ban ieng skhem na ka bynta ban pyntreikam ïa ka ILP bad katba ym pat ioh ïa ka ILP dei ban pyntreikam da ka MRSSA 2016, na ka bynta ban khanglad ïa ka jingwan rung kynthep ki mynder shakane ka jylla.

Nalor kata, u la bynrap ruh da kaba ong ba ka mat kaba kham kongsan ba ka seng ka ieng ka dei ban pysnted noh ïa ka jingpynbeit pud pynbeit sam hapdeng ka Meghalaya bad ka Assam, ha kaba u la pynpaw ruh ba ka don jingduhnong ha ka jingïapynbeit ha ka phase-I bad ha kane ka phase II, u la kren shai ba ki 18 tylli ki shnong ba don ha Block II jong ka Raid Nongtung ha Ri Bhoi District ki dei beit ban hap ha ka jylla Meghalaya.

Nalor kitei ki hajar ngut ki nongïalam bad ki dkhot ka seng, ki nongïalam ba hakhamt ba la shim bynta lang ha kane ka General Council ki kynthup ïa Chief Adviser u Bah Augustine Sten, u Working President u Bah Liander Nongshli, u Political Secretary u Bah R.J Thangkhiew, u Assistant Secretary u Bah Denis Syngkli lem bad kiwei kiwei ki nongïalam bad ki dkhot ka sengkmie.