Nongpoh, Ïaïong 11: Ka jingpyntreikam ka Seng Ri Bhoi Youth Federation (RBYF) da ka Welfare Fund ha ka jingtrei kam bad shakri hapoh ka lama ka seng, ka la long shisha ka jingmyntoi ym tang ïa ki paidbah ka seng ka la shakri, hynrei kane ka ai jingmyntoi ruh ïa baroh ki dkhot ba pura ka seng RBYF.

Haba kren sha ki lad pathai khubor mynta ka sngi ha ka General Council ka RBYF ha Pahamsyiem, u Bah Bipul Thangkhiew kum, u President ba rangbah ka seng, u la ong ba ka seng ka la pynshai ruh sha baroh ki dkhot halor kane ka Welfare Fund ban pyntreikam da ka seng, ha kaba ki dkot ki hap ban siew 300 uwei u dkhot man ka snem bad na kane ka pisa pat kin ïarap ïa kito kiba pang ba shitom bad kiba kynduh jingeh ha ki ing ki sem jong ki para dkhot.

U la ong ba ka RBYF ka la don mynta haduh 9000 ngut ki dkhot bad lada siew uwei uwei u dkhot kan poi beit sha ka 27 lak tam ha ka shisnem bad na kane ka pisa kin ïarap kylla ïa ki dkhot ha ka pang ka shitom na ha ka kam ïap ka kam im.

Shuh shuh, u la bynrap ruh lyngba katei ka pisa kaba lum na ki dkhot kaba long kum ka Welfare Fund, kam dei satia tang ban ïarap ha ka pang ka shitom ne ha ka kam iap ka kam im, hynrei ka seng ka ai ruh da ka ram ïa ki dkhot kiba pyrshang ban seng kam seng jam la jong ha ka sut ka barit. Kane ka long kum ka jingaikam ai jam ïa ki para dkhot bad nalor kata ki hap ban ai pat ka jingshakri kaba para ïa ka seng na ka bynta ban shakri kylliang ïa ki paidbah ka District, u la bynrap.

Shuh shuh, u la ong ba kane ka juk mynta ka dei ka juk ba kyrduh kam kyrduh jam ba ka sorkar kan nym lah ban ai kam sorkar ïa ki samla, hynrei da kaba lum pisa na ki dkhot ha ka dur jong ka Welfare fund kane kan ïarap kylla ïa ki, lada ki angnud ban seng kam seng jam lajong, u la bynrap shuh shuh.