Shillong, Ïaiong 20: Ka Green Tech Foundation (GTF) hynne ka janmiet ka la pynbna ban weng noh ïa ka jingïakhih shah thngan hadien ba ka Sorkar ka la ai da ka jingthoh ba la weng noh ïa u dewlynnong Lumpongdeng ban tei ïa ka Project 7 Star Hotel ha Umiam.

Lah ban kdew ba 2 ngut ki nongïalam ka GTF ki la pynlong ka jingïakhih da kaba shah thngan ha Madan Malki ban pyrshah ïa ka projek ka tnat Tourism ha Lumpongdeng.

Ïa kane la pynbna da u Chairman ka GTF u Bah H Bansiewdor Nonglang hadien ba u la wanphai na Woodland Hospital.

Haba pynbna ïa ka rai, u Bah Bansiewdor u la ong ba ka Sorkar ka la pyndem ym ha ka GTF hynrei ha ki paidbah baroh kiba pyrshah ban tei Resort bad Spa ha u dewlynnong Lumpongdeng Umiam.

U la ong ruh ba kane ka rai jong ka Sorkar ban weng noh ïa u dewlynnong Lumpongdeng na ka Project 7 Star Hotel ban tei ha Umiam ka pynthikna biang ba u Lumpongdeng u dei jong ki paidbah bad jong ka pateng ban wan.

“Hadien ba ngi la ioh pdiang ïa ka shithi na ka Sorkar ba ka la weng noh ïa u dewlynnong Lumpongdeng na ka Project 7 Star Hotel ban tei ha Umiam, namar kata naduh mynta ka janmiet ngi la rai ban weng noh ïa ka jingïakhih bad ngin leit phai noh sha la iing” la ong u Bah Bansiewdor.

“Ki ummat ba jaw, ki jingpait dohnud, 12 sngi ka jingshah thngan, 20 tylli ki Drip, ngi la ioh ïaka jingjop. Ki lah pyndem” u la ong.