Nongstoin, Ïaïong 21: Kiba bun ki ïing ki sem bad ki jingthung jingtep mynta ka step jong ka 21 tarik u Ïaiong 2026 ha ka por 1 baje ei ei ki la shah pynjot bad shah lynshop  ha ka eriong kaba jur kaba wan ryngkat u lap, ha kaba katto katne ki shnong ha ka thain Rambrai bad khamtam ha ka shnong Mawlangbah kaba don ka jingjngai kumba 6 km na Rambrai ba hap ha West Khasi Hills.

Haba ioh ban kren bad u Sordar ka Shnong ka Shnong Mawlangbah, u la ïathuh ba na ka jingwan lynshop kane ka eriong ki don haduh 20 tylli ki ïing kiba la shah pynjulor bad kynthup ruh ïa ka ïingmane jong ka Balang Presbyterian Mawlangbah bad ka ka ïing skul jong ka Mawlangbah LP Skul.

La ïathuh ruh kane ka eriong ka la ktah jur ruh ïa kawei ka Longïing kiba la mynsaw haduh 4 ngut ba kyntup ïa u kpa, ka kmie bad 2 ngut ki khun ba la pynkit noh sha Civil Hospital Nongstoin ba shah sumar.

Kumba la ïathuh da u Sordar Shnong, kitei kiba la mynsaw la tip kyrteng kum u Bah Carmelius Lyngdoh Kpa (39) , ka Kong Basidalin Kharbani ka Kmie (30), u Ribok Kharbani khun (13) bad u Shngainbor Kharbani khun (9) bad ïa u Ribok Kharbani la pynkhreh ban kit noh sha Shillong na ka jingmynsaw jur.