Shillong, Jymmang 04: Ka samla Meghashreee Roy kaba wan ha ka kyrdan ba nyngkong lane kum kata ka topper ha ka HSSLC Result 2026 ka MBOSE haka Arts Stream, ka la pynpaw ba daw ba ka la poi sha kane ka jingjop, ka dei ba ka pynlut por ban ngam jylliew ha ka jingpule kot bad ym tang da kaba shu pule lyndet ïa ki Kot.

Haba la pynban mynta ka sngi ka Result jong ka HSSLC ha ka arts Stream da ka MBOSE, ka Samla Meghasreee Roy na ka St. Mary;s Higher Secondary School, Shillong ka la wna ha ka kyrdan ba nyngkong eh da kaba ka la khur haduh 457 mark bad ka la ioh letter marks ïa baroh ki sobjek ba kynthup ïa ka sobjek English, Economics, Home Science, Education, Political Science bad ka Alternative English.

Haba jubab sha ki Nongtoh Khubor halor kane ka jingjop jongka kaba la long ka burom ïa ka ing ka sem bad ïa ka skul ba ka mihkhmat, ka Samla Roy ka la ïathuh ba ka kwah ban bteng ïa ka jingpule ha Delhi University da kaba jied ïa ka sobjejk political Science.

Ka la ïathuh ruh ba ka don ruh ka thong ban ïa khun ïa ka UPSC exam bad ka angnud ban  long ki Civil Servant.

Nalorkata, haba kylli halor ki jingpynkhreh ïa ka exam, ka la ïathuh ba la tang 2 kynta shi sngi ka kreh kot bad ka pynleit jingmut bha pat ha ki jingpule bad ym ban shu pule lyndet ïa ki kot. Ka la ong ruh ka pyrshang ruh ban wad bniah ruh ïa ka jingkhreh kot da kaba leh ïa ka Mock test bad pyndonkam ruh ïa ki Chatgpt, tang ba ka leh ha kata ka rukom ba kan ioh jingmyntoi bad ka kham  phai kyrpang ïa ka jingai jingmut ki nonghikai, namar lada ka don kano kano kaba kam sngewthuh ka pan jingïarap na ki Nonghikai.