Khliehriat, Jymmang 18: Haba leit tur mynta ka sngi sha Secretariat ha Nongbah Shillong ban pynpaw ia ka jingpyrshah ïa ka Public Hearing ka Shree Cement limited ha East Jaintia Hills ba la pynbeit ban pynlong ha ka 22 tarik u Jymmang, u President ka ka Jaintia National Council (JNC) u bah Sambormi Lyngdoh u la ong,  ba kane ka jingïakhih pyrshah ïa ka Shree Cement Limited ka dei kaba la sdang naduh u snem ba la dep bad u la kynnoh ruh ba ka sorkar ka la thom da ka bor ïa k paidbah ba pyrshah da kaba pyndonkam da ki Mafia bad ki gang ban khang ïa ki paidbah kiba pyrshah ïa ka Public Hearing.

“Dei halor ka jingleh kuman ka sorkar jylla ka bym shym la sngap ïa ka sur ki paidbah nongshong shnong ka Shnong Daistong kiba pyrshah ïa ka Shree Cement ban tih mawshun na Lum Syrman bad ban buh ïa ka Cement Plant, ka seng JNC bad ka JSU ryngkat ki paidbah kim banse ban tur noh sha Secrtariat ban pyrshah ïa ka sorkar bad ban dawa ban pynsangeh ïa katei ka Public Hearing” ong u Bah Lyngdoh.

SA PULE RUH || https://meghalayapost.news/india/kem-ding-kynsan-ka-rel-ha-madhya-pradesh-lait-ki-68-ngut-ki-nongshong-na-jingmynsaw-10013402.html

U la ong ruh ba mynta ka jingïakhun kam dei shuh bad ka Shree Cement Limited bad ka la dei ka jingïakhun ïa ka sorkar jylla, namar ka sorkar ka la thom daka bor ban ailad ïakatei ka Shree Cement Limited ban buh Cement Plant bad ruh ban tih ïa u Mawshun na Lum Syrman wat la ki paidbah ki la pyrshah jur.

U la ong ruh ba ka sorkar jylla ka la pynkhein ruh wat ïaka Land Transfer Act ban ailad ïa katei ka Company ban pyndonkam haduh 217 hectare ka jaka na ka bynta ka Cement Plant bad lada ailad kane kan ktah lut ïa ki nongshong shnong ka shnong Daistong kiba im jakpoh na ka rep ka riang.

U la pynkynmaw ruh ka don ruh ka krem ha katei ka jaka kaba u Kiang Nongbah u la rieh na ka jingtwet ki phareng ha ka jingïakhun laitluid ïa ka ri bad lada ailad ban don kane ka cement Plant kan ktah ruh ym tang ïa katei ka krem kaba la sahnam bad kan ktah ruh ïa ki khlaw ki btap, ki umbam ki umdih bad ki jaka rep jong ki paidbah.

Namarkata, u la bynrap ruh da kaba ong kumba ka sorkar ka leh kuman ïa ka jingpyrshah ki paidbah, ka seng JNC bad JSU mynta kin ïakhun pyrshah ym shuh ïa ka Shree Cement Limited bad kin ïakhun pryshah ïa ka sorkar ba ka dei ban sangeh ban pynlong ïa ka Public Hearing bad ban buh ïa katei ka Cement plant bad lada ka sorkar ka dang leh kuman kin sa shim da ki jingïakhih kiba kham tyngeh shuh ban tur sha Secretariat ha kaba mynta ki dang tur  da ka lynti kaba jai jai bad ym da kaba thombor ba ki burom ïa ka bor synshar District bad ïa ka tnad Pulit, u la bynrap.

SA PEIT RUH ||