U Director General of Police ka jylla Assam, u GP Singh mynta ka sngi, u la pynbna ba la bthah ia u Commissioner of Police ka nongbah Guwahati bad ia u Superintendent of Police ka Tinsukia ba kidei ban sospon kam ia ki pulit kiba donkti ban shoh dusmon ia ki riew paidbah ha kine ki khyndiat sngi ba lah dep.
Kane ka jingpynbna jong utei u heh pulit ka jylla Assam, kadei hadien ba uwei u samla pule, u Pradum Chettri ha ka 26 tarik mynta u bnai Jylliew, u la kynnoh ba u la shah shoh ha u Sub-Inspector Pranjal Phukan bad laingut kiwei pat ki pulit langrut na ka Lekhapani Police Station.
Katkum ka tyllong khubor ba la ioh lum, la iathuh ba utei u Pranjal Phukan uba khlem phong ia ka uniphorm pulit, u la kynriah jubor ia u Pradum Chettri na ka jaka pynieng kali bad shoh artad khlem ka nongrim ne ka jingpynibor.
Na ka liang jong ki bahaing hasem utei u Pradum Chettri, ki la ujor syndon da ka ejahar pyrshah ia kitei ki pulit kiba la pynibor bad shoh khlem nongrim ia utei u bahaing jongki ban ioh ia ka jingbishar kaba hok.
Na ka liang utei u heh pulit ka jylla Assam, u GP Singh, u la ong ruh ba ka tnad Assam Police kan nym iashah ia ki kam thombor pyrshah ia ki riewpaidbah da kaab ong ruh ba wat lada don ka jingpynshit ne ka jingpynibor ruh, ki pulit kidei ban long kiba lah ban iaishah katba lah.
