Ha kawei ka jingjia ha West Garo Hills hynnin ka sngi, uwei u shipai jong ka Border Security Force (BSF) jong ka ktem 100 Bn u la duh noh iala ka jingim hadien ka jingshah iuh bad shah kyrdem ha u Hati khlaw.
Utei u shipai BSF uba la duh ia la jingim ha katei ka jingjia, udei uba la tip kyrteng kum u Rajbir Singh bad udei uba bat ia ka kyrdan Sub-Inspector.
Katkum ka tyllong khubor ba la ioh lum, la iathuh ba utei u Rajbir Singh u dang don ha ka kam ha ki bynta jong ka thain Dalu lem bad kiwei pat ki shipai langrut jong ka BSF, ha kaba kynsan la wan mih ka kynhun jong ki Hati khlaw bad beh ia u.
La iathuh ruh ba u Rajbir Singh, u la pyrshang ban phet krad ialade na katei ka jaka, hynrei uwei na kitei ki Hati khlaw, u la ioh ban iuh bad kyrdem kat haduh ba un khlad syndon hajuh. Ia ka met kaba sah jong une u shipai, yn pynkit noh sha ka jylla Haryana na ka bynta ban pyndep ia ka jinglehniam kaba khatduh.
