Ka seng Federation of Khasi Jaintia & Garo People (FKJGP) Sohkwhai-Umdu Unit mynta ka sngi ka la pynpaw ia ka jingpyrshah jur halor ka jingiaid jong ki trok kit Dieng, Rnga bad Dewiong beain kaba la pynjot bad pynsniew shikatdei ia ka surok naduh na Sohkhwai-Umdu ter ter shaduh sha 20 Mer.
U Bah Shemphang Wahlang, President jong katei ka Unit ka seng FKJGP u la iathuh ba ha ka jingshisha, katei ka surok kaba pyniasoh naduh na Umrit sha Sohkhwai bad mih pat sha u surokbah National Highway 6 ha 20 Mer, kadei kaba long ban iaid tang ki kali kiba don ia ka jingkhia kaba hapoh 9 Ton.
Hynrei na kapor sha ka por, la iohi ba ki trok kiba kit beain ia ki Dieng, Rnga bad Dewiong ryngkat ka jingkitkhia kaba palat pud ia katei kaba la buh da ki bor pyniaid District ka Ri Bhoi namar ka jingbym shngain shuh jong ka jingkieng kaba don ha ka shnong Lailad.
Ha kane ka sngi, ki nongialam jong ka seng, ki la lap ruh ia kawei ka trok kit Rnga kaba la liat sha nala namar ka jingkhim jong ka surok bad kaba kit palat ia ka 9 Ton kaba la buh. Ki nongialam jong ka seng ki la dawa ba ki bor pulit kidei ban shimkhia ban pynshitom ia katei ka kali bad ruh ban pyrkhing nangne shakhmat ban nym ailad ia kitei ki jaid kam beain ba kin pyndonkam lyngba katei ka surok.
Ki la byrthen ruh ba lada ki bor pulit kim leh eiei, na ka liang ka jongki, kim banse ban leh hi ia kaba donkam lashai lashi sngi ban nym ailad ia ki trok kiba kit ia ki Dieng, Rnga bad Dewiong beain ba kin ioh iaid sahuh lyngba katei ka surok, naba ym tang ba ka pynjot ia ka surok kaba la sniew lypa, hynrei ka wanrah ruh ia ka jingdheng kali bad khamtam ka jingma ia ka jingkieng kaba don ha ka shnong Lailad.
