Nongpoh, Jylliew 22: U Myntri sorkar ba dei peit ia ka tnad General Administration Department (GAD) u Bah Sosthenes Sohtun mynta ka sngi u la leit ban jurip ia ka Meghalaya House kaba don ha Vellore kumba ka sorkar kala thmu ban shna noh da ka building kaba thymmai ha kaba mynta dang ap sa tang ka jingmynjur na ka tnad Planning bad ka tnad Finance.
Kum ban pynkynmaw, kane ka Meghalaya House kaba don ha Vellore, ka dei ba ka sorkar ka iarap kyrpang ban ioh sah na ka bynta kito kiba leit sumar ha Christian Medical College (CMC) Hospital kaba don ha Rangapuram, Sathuvachari.
Haba kren sha ki lad pathai khubor hadien ka jingjurip, u Bah Sosthenes Sohtun u la ong ba mynta ka sngi u la leit ban jurip ia katei ka Meghalaya House kaba don ha Vellore bad ka jingthmu ka long ban peit ban khmih ia ka jinglong jingman ba ka sorkar ka la thmu ban tei thymmai noh ia kane ka Meghalaya House.
U la ong ruh ba ka daw kaba ka sorkar ka thmu ban tei thymmai, ka dei namar ba ka jinglong jingman katei ka Meghaaya House ka la jot lut bad la donkam ban tei thymmai, ha kaba ia kane la pynpaw ruh da ki engineer ka tnad PWD.
Ua la iathuh ruh shen ka sorkar kan sdang ban tei noh ia ka building kaba thymmai ha kaba mynta ki dang ap sa tang ka jingmynjur ka tnad Planning bad ka tnad Finance ka sorkar jylla.
Shuh shuh, u la iathuh ruh ba ka sorkar ka la dep ban shim wai ruh da ka Guest house na ka bynta ban pynkynriah ia kito kiba sah ha katei ka Meghalaya House ha Vellore bad tang hapoh une u bnai kin kynriah ia baroh kiba shong sha katei ka guest house ba la wai da ka sorkar khnang ban ioh sdang noh ban tei da ka building kaba thymmai, ba ka jingthmu ka long ban dang pynsuk shuh shuh ia kito kiba leit shah sumar ha CMC Hospital ba ka sorkar ka la pynbiang naduh ki jaka sah bad ruh wat ka leit ka wan jongki.
Sa Peit Ruh
