Khliehriat Jylliew 22: U Dr. Heipor Uni Bang kum u Principal ka K.B Memorial Higher Secondary School, Wapung bad uba la ioh pdiang ruh ïa ka National Teachers’ Award na ka President ka Droupadi Murmu bad u dkhot ka Khasi Authors’ Society mynta ka sngi u la mih ban kren shaphang u Thomas Jones ba mynta ka sngi la rakhe kyrpang kum kata ka Thomas Jones Day ban burom ïa une u missionary uba la tip ruh kum kpa ki Alphabet Khasi.
Haba kren sha ki lad pathai khubor, u Dr. Bang u la ong baroh ki ophis sorkar, ki skul bad ki tnad treikam sorkar ki khang mynta ka sngi ka long ban burom ïa une u missionary uba la wan poi sha rilum Khasi-jaintia na Wales lyngba ki jingeh kiba bun kiba u wan da ka Lieng bad ka jingwan jong u sha kane ka rilum Khasi Jaintia ym dei tang ban ïalap ïa ka Gospel bad u dei ruh uba pynneh pynsah ïa ki riti ki dustur bad uba la wan rah ruh ïa ki dak thoh lane ki Alphabet Khasi, kaba mynta ngi la pyndonkam haduh kine ki sngi.
U la ong ruh dei lyngba ka jingwan une u sahep Thomas Jones, ha kaba tang tang 8 bnai u sah ha Sohra, u la sdang ban pyrshang kren Khasi bad tang hapoh shi snem u la lah ban shna ïa ka ktien Khasi bad sdang ruh ban hikai ha Mawsmai bad nalor kata u la pynkylla Khasi ruh ïa kiba bun ki Kot.
Kaba kham khraw ka long ba u la wan rah ïa ki Dak Pule Khasi lane ki Khas Alphabet ha kaba la tip ruh ïa u kum u Kpa jong ki Alphabet Khasi ba mynta la pyndonkam ïa ka ktien Khasi lyngba ki Alphabet Khasi naduh ki Pnar, ki Bhoi, langam bad kiwei.
“Ka long kaba donkam ban tip ïa ki ktien nogwei, hynrei ngim dei ban klet pat ïa ka ktien lajong” ong u Dr. Bang bad bynrap ruh bun ki pyndonkam ïa u dak C bad F ha ka Khasi bad kine ki dei ki dak thoh phareng (English) bad ki dak kum u ï bad u ñ ki la sdang duhjaid ba bun ngim ju pyndonkam ïa ki. U kyrpang ruh ban pyndonkam ïa ktiei ki dak khang ba kin nym duhjaid.
Ha ka jingdawa ki paidbah ka Jaintia ban don noh ki dak thoh la kajong, u Dr. Bang u la ong ba kam dei kaba sinew ban dawa ban don bun ki dak thoh ha ka jylla, hynrei kumba long haduh mynta ngi hap ban ban khia shuwa ïa ka Ktien Khasi ba kan long kum kata ka ktien pdeng jong ki Khasi-Jaintia.
Pule ruh: Bthei Kynsan Ka Jaka Shalan Gas Ha Qatar, Mynsaw 54, Jahrngai 18 Ngut
U al ong ruh ba ma u ruh u dei u pnar ba ngi donkam ban don bun ki ktien, hynrei ngi donkam ïa ka Ktien Khasi kum ka ktien pdeng bad ba kan long ruh kum ka shatri kaba ngi pyndonkam lang ïa ka ktien Khasi ban pyndonkam da ki paidbah ka rilum Khasi Jaintia.
Shuh shuh, u la bynrap ruh da kaba ong ba ïa ka ktien Khasi la dawa ban kan ioh rung noh ha ka khyrnit ba phra ka Eight Schedule jong ka riti synshar ka ri bad ba ka ktien Khasi ka la long ruh kum kata ka ktien sorkar ha Meghalaya ha kaba lah ban pyndonkam ha ki tnad sorkar bapher bapher bad lada ka ioh noh ïa ka jingithuh da ka sorkar pdeng ne ba kan rung noh ha ka khyrnit ba phra ka rity synshar ka ri, kane kan ïarap shibun eh ïa ki samla ba ïakhun kam ha UPSC kum ka IAS, IPS, IFS bad kiwei kiwei kaba kim donkam shuh ban thoh ha ka ktien English bad ki la lah ban thoh ha ka ktien Khasi, u la bynrap.
Peit ruh:
