Shillong, Naitung 02: Haba ialap election mynta ka sngi ha iew Kynshi ban pan ka jingkyrshan na ki piadbah ha kane ka MP election shiteng samoi na ka Shillong parliamentary Constituency, u Dr. DRL Nonglait kum u Kyrtong ka NPP party, u la ong ba u sngewlung ka mynsiem ban kynmaw ia ka Shnong Kynshi, namar dei lyngba ka Shnong Kynshi kaba u la sdang ban pule skul lyngba kiba bun ki jingeh kiba u ia kynduh ban poi shaduh ka kyrdan Nonghikai ha ka skulbah North East Hills University, Shillong.
U la ong ruh dei tang ka jingsngewrit, ka jingtrei shitom bad ka jingminot ba ngi lah ban poi sha ka thong jong ka jingim bad haba ngi don kata ka mynsiem ban kiew ha ka jingim, ki jingeh bad ki jingtynjuh kin nym lah ban khang ia u briew ban poi sha ka thong kaba u angnud.
Haba ialap election ha kane ka iew Kynshi, u Dr. Nonglait u la ong ba dei ka shnong Kynshi bad ka iew kynshi kaba plie lad ia u ban ioh pule, namar ha katei ka por ka jingduk jingkyrduh ka dang ban bha ha katei ka thain bad ban ioh pule skul u hap ban die jingbam bad ka kmie ha iew Kynshi.
U la iathuh ruh dei na ka shnong kynshi kaba u sdang ban leit skul bad hadien bad u la bteng pat sa ha ka Shnong Pariong bad shaduh sha Nongbah Shillong, kiba dei lyngba ka jingleit bylla sngi lade ban ioh lad ban pule bad wat ban kyrshan ia ki para bad ka ing ka sem.
Kumba u la pynpaw, ym tang katta ba u trei shitom bad bylla da lade ban ioh pule shaduh ka kyrdan Master Degreee ha NEHU, hynrei hadpeng ka jingiaid lynti u la don bynta ruh ban phai khmat lem ia ka eh ka shong jong ki shnong ki thaw kum ka PHC ha Myriaw bad Kynshi bad ruh ki umbam ki umdih bad wat ha kiba bun ki bynta jong ka imlang ka sahlang u la ia don ryngkat bad ki paidbah jong ki shnong bapher bapher ha katei ka thain Kynshi,
Shuh shuh, u la ong ruh u la trei ruh wat ia ka kam sorkar bad hadien kata u la iehnoh noh ia ka kam sorkar ban bteng ka jingpule, namar ha katei ka por dang bun bha ki kam bylla kiba u ioh ha Shillong bad dei lyngba ka jingbylla sngi u la lah ban pyndep ia ka kyrdan Master Degree bad haduh ba u la kylla long kum u nonghikai ka skulbah NEHU.
Namarkata, kam don kano kano kaba eh ia u briew ban poi sha ka thong kaba u angnud bad donkam tang ka jingtrei shitom, ka jingsngewrit bad ka jingminot thop bad kita kiba trei shitom ha ka jingim kin poi beit sha ka jingangnud kaba ki wah ha kaba U Blei ruh u btin lynti ia kum kita ki briew, u la bynrap.
Sa peit ruh
