Nongpoh, Naitung 02: Ki nongialam ka All Raid Marwet People Federation (ARMPF), ki la leit ban kynduh ia ki nongialam shnong ka Rajabagan, kawei na ki shnong ha Byrnihat bad kaba don shibun ki Karkhana, ha kaba ka nongrim kaba la pynlong ia ki nongialam ka ARMPF ban kynduh ia kitei ki nongialam shnong, ka long ban tip ia ka jingeh ki paidbah, kiba ju kynduh jingeh na ka jingdon ki Karkhana bad kaba la wanrah ia ka jingpynjaboh ia ka mariang.
Lyngba katei ka sngi, ka la don ka jingiakren hapdeng ki ARMPF bad ki nongialam shnong ka Rajabagan, ha kaba ki nongialam shnong, ki la pynpaw ba ki paidbah ha katei ka thain, ki mad jingeh shisha halor ka jingdon ki Karkhana, namar ka pynmih tdem na ki Karkhana, ka pynjaboh ia ka lyer bad kumjuh ia ki um ki wah.
Haba kren sha ki lad pathaikhubor hadien ka jingialang, Anata Timung, Rangbah Shnong Lower Balian, u la ong ba ka jingjaboh ka lyer ha katei ka thain, ka la long shaba palat, ha kaba nalor ka jingjaboh ka lyer ring mynsiem, hynrei ka ktah eh wat ia ki jingthung jingtep, khamtam eh ia u Tympew, uba dei u mar rep ba ki briew ha katei ka thain ki rep ki riang.
Utei u Rangbah Shnong, u la kynnoh ba ki Karkhana kiba don ha katei ka jaka, ki pyndonkam ia ki tiar ba iada pynmih lyer jaboh tang ha ka por ba wan jurip ki briew ka ain, hynrei ha ka por ba ym don kiba wan jurip, kim pyndait ia kitei ki tiar kiba iada ban pyllait ia ka lyer jaboh.
Katba na ka liang ki nongialam ka ARMPF, lyngba u Bah Ring Sohpdang, ki la pynpaw ia ka jignsngewkhia halor ka jingjaboh ka lyer ha ki shnong ha thain Byrnihat bad kaba la buh jingeh ia ki paidbah.
Kumta na ka liang ka seng ka kyntu ia ka sorkar jylla, ba ka dei ban shimkhia ne ban tehlakam halor ka jingjaboh ka lyer ha Byrnihat bad ha kajuh ka por, ki la ong ba kin sa leit ban kynduh ia u Syiem Raid Marwet, na bynta ban kyntu ia u ba nangne shakhmat, ba nangne shakhmat, ba um dei shuh ban ai NOC ia ki Karkhana kiba dang kwah ban pyntrei ha katei ka thain.
Sa peit ruh
