Nongpoh, Naitung 02: Ki paidbah kiba shong ba sah ha ki shnong bapher bapher ha ka thain Rani Bari sha liang Assam, ki la pyrshah ia ka jingkyntur pud ka Meghalaya sha katei ka thain, ha kaba ki la kynnoh ruh da kaba ong ba ka Meghalaya, ka la kyntur pud sha katei ka thain lyngba ki kam pynroi, kata lyngba lynti syngkien, ki surok, ki umbam umdih lem bad shibun kiwei pat ki kam pynroi.
Katei ka thain Rani Bari, ia kaba la kynnoh ba ka Meghalaya, ka la kyntur pud sha ki bynta ka Assam lyngba ki kam pynroi, ka dei kaba hap khappud ka Meghalaya bad Assam, ka hap ha Jirang Constituency bad kaba la mihkhmat da u Bah Sosthenes Sohtun, kum u MLA bad uba long ruh u Myntri ha ka sorkar jylla.
Halor katei ka jingkyntur pud ka Meghalaya sha ki shnong kiba la hap sha Assam, ki briew na ka jylla Assam, ki la pyntip sha ki bor Distrik ka Kamrup bad kiba la pynpaw ba ka Meghalaya, ka la kyntur pud shaba palat sha katei ka ka thei, ha kaba ka la kyntur pud ha ka dur jong ki kam pynroi sha baroh ki shnong khappud kiba don ha katei ka thain ba khappud ka Meghalaya-Assam bad kaba hap ha Jirang Constituency.
Haba iadei bad katei ka jingujor ki briew ka jylla Assam sha ki bor Distrik ka Kamrup, na ka liang ki bor pyniaid Distrik ka Ri Bhoi, ia kaba la ialam da u Raja Brahma. Additional Deputy Commissioner ka Ri Bhoi, nangta u Bah Eric Dkhar, u Magistrate bad uba dei uba dei u BDO ka Umling Block, ki la leit ban pynlong ia ka jingialang bad ki bor pyniaid Distrik ka Kamrup, ha kaba ka jingiakren hapdeng ki bor Distrik na Ri Bhoi bad Kamrup, ka long ba ki kam pynroi ha ki shnong khappud ym lah ban khang bad ba ki dei ban iaid beit shakhmat.
Sa peit ruh
