Nongpoh, Naitung 05: Ka Ri Bhoi District Congress Committee mynta ka sngi ki la pynlong da ka jingiakynduh lang ha Nongpoh ban ia kren halor ki kam ban pynkhlain ia ka party bad ruh halor ki mat ki jura kiba ktah ia ki samla pule ha ka jylla bad ka ri India hi baroh kawei.
Haba kren sha ki lad pathai khubor, u Adhoc President ka Ri Bhoi District Congress Committee (RBDCC) u Bah C.B Syiem, u la ong ba ha kane ka jingialang la ia kren kyrpang halor ki jingeh jong ki samla pule ka ri ha kaba la ialam da u Rahul Gandhi ban ialap ha kylleng ki jylla ka ri halor ki jingeh jong ki samla pule bad haduh ka liang ka ioh kam ka ioh jam.
U la ong ruh ba ka Party Congress ha ka ri India hi baroh kawei ka la mih shakhmat ban ia kren halor ki jingeh ki samla pule, da kaba kynnoh ba ka pule ka puthi ha ka ri India ka la hiar sha ba palat bad ka la ktah jur ia ki samla pule.
Sa pule ruh: Top Court Rejects Meghalaya Govt Plea To Cancel Sonam’s Bail
“Ka jingshah ktah ki samla pule ka dei naduh ka jinglait tuh ki Question Paper, ka jingpynlut phut ia ka pisa paidbah ha kaba pynlong ia ki exam bapher naduh ka NEET, ka jingthungkam ha Railway, ka jingthungkam ha UPSC, ka jingthungkam JEE bad kiwei kiwei” ong u Bah C.B Syiem bad bynrap ruh ba kaba ktah bha ka long ba ka sorkar ka pynlut da ki lak klur tyngka katba ki samla pat ki duna ha ka ioh kam ka ioh jam bad ha ki kam pule” u la bynrap.
U la kynnoh ruh ba ka sorkar BJP ka la pynlut da ki lak klur ha kaba pynlong ia ki exam thung kam thung jam nad kiwei kiwei ki exam bad ka pule ka puthi bad ka ioh kam ka ioh jam pat ka duna bha ha kaba kane ka la ktah ia ki samla jong ka ri.
U la ong ruh kum ka jinglait tuh ki paper ka NEET ha kaba la don ki samla kiba la pynkut ia la ka jingim bad kane ka la ktah jur bhai a ki samla kiba hap thoh exam biang bad kane ka dei ka jingbym kit khlieh ka sorkar BJP.
Namarkata, u la bynrap ba ka Paty Congress ka khot ka wer ia baroh ki samla ka Ri Bhoi District bad wat ha ka jylla ba kin wan ban ai jingmut ne pynpaw ia kino kino ki jingeh ha kaba ia dei bad ka pule ka puthi ne ka thungkam ka thung jam bad na ka liang ka party Congress kum ka liang pyrshah kan kren ha Parliament bad ruh ban shim ia ki jingai jingmut ki samla kiba long ka jingdonnkam ban tei thymmai ia ka lawei jong ki samla ha ka jylla bad ka ri hi baroh kawei, u la bynrap.
Sa peit ruh
