Nongpoh, Naitung 04: U Adhoc President ka Ri Bhoi District Congress Committee, u Bah Cleophas Syiem u la Pynpaw ba Watla ki don kiba rung bad mih na ka party, hynrei kane kam shym la ktah ïa ka jingnang ïoh bor bad ka jing ïatylli jong ka Congress ha Ri Bhoi.
U Bah Cleophas Syiem u la ong, ka jingmih noh u President barim na ka party kam shym la pyntlot ïa ka Congress ha Ri Bhoi. Hynrei, bun ki riew rangbah bad ki nongkyrshan ki dang ap khmih lynti ban wan pynïasoh sha ka party.
U Bah Cleophas u la ong ruh ba ka Congress ka dang ïoh ïa ka jingshaniah na kiba bun ki paidbah ha Ri Bhoi, namar ka long kawei na ki party kiba dang ïaineh bad bteng ban shakri ïa ki paidbah haduh mynta. U la kdew ruh ba ha kane ka election MP shiteng samoi, la ïohi ba bun ki riew Rangbah ki dang shaniah hi haka party congress bad khlem artatien ka Congress kan ioh iaka jingjop ha kane ka election MP ba mynta.
Ha kajuh ka por, u Bah Cleophas u la pyntip ba hadien ka jingiehnoh kam u Bah Rocky Marwein kum u President barim ka Ri Bhoi District Congress Committee, ka Meghalaya Pradesh Congress Committee, lyngba u President ba rangbah, u Ma Vincent H. Pala, ka la thung ïa u kum u Adhoc President ban shimti ïa ka kam jong ka party ha ka distrik.
Shuh shuh, u la ong ba ha ki sngi ban wan un sa lum bad pynlong jingïalang bad ki samla bad ki riew rangbah jong ka party, khnang ban pynkhlaiñ shuh shuh ïa ka party bad ban nang pynjanai shuh shuh ïaka kam jong ka party Congress ha Ri Bhoi.
Sa peit ruh
