New Delhi, Naitung 12: Ha Ka sngi pynkut ïa ka 4th Meghalaya Pineapple Festival kaba la long ha Dilli Haat, New Delhi, la sakhi ïa ka jingwan tuid ki paidbah ban wan thied ïa u sohtrun na Meghalaya. Haduh kumba 3 baje janmiet, bun bah na u sohtrun uba la buh ha ki stall u la lut noh, kaba pynpaw shai ba u sohtrun na Meghalaya u dang bteng ban long uwei na ki marrep kiba don ka jingdawa kaba jur ha ki ïew jong ka ri.
Haba ïoh ban ïakren bad katto katne ki paidbah kiba la wan jngoh ïa kane ka tamasa, ki la pynpaw ba u sohtrun na Meghalaya u dei uba bang bad uba thiang tam, Ki la ong ruh ba ka Meghalaya Pineapple Festival ka dei ka tamasa kaba khring bha ïa ki paidbah bad kaba ai lad ïa ki ban ïoh mad bad thied ïa u sohtrun ba pawnam ka jylla. Kumta, ki la kyrpad ïa ka Sorkar Meghalaya ba haka Tamasa ka ban wan Ki la kyrpad ia ka sorkar ba kin wanrah kham bun shuh shuh ïa u sohtrun, namar ha kane ka sngi pynkut bun ki paidbah kim shym la ïoh ban thied satia ïa u namar ba u la lut noh shuwa ban kut ka por die.
Ha kane ka tamasa kaba la neh lai sngi, ka Sorkar Meghalaya ka la wanrah haduh 25 metric ton u sohtrun sha New Delhi bad Kumba 250 ngut ki nongrep bad ki nongsengkam lajong na kylleng ki distrik jong ka jylla ki la wan shim bynta ban pyninam bad die ïa ki marrep bad ki mar jong ki. Ka jingïaid beit ïaid ryntih jong kane ka tamasa ka la pyni shai ïa ka jingjop ha kaba kyntiew ïa u sohtrun na Meghalaya sha ki ïew kiba heh jong ka ri bad ka la plie ruh ïa ki lad ki lynti kiba kham bha na ka bynta ki nongrep bad ki nongsengkam lajong jong ka jylla.
Ha kane ka tamasa, la pynshongkun bad pynshongshit shuh shuh da ki kynhun rwai bad ki nongput nongtem bapher bapher na jylla Meghalaya, kiba la pynbyrngia ïa ki nongwan peitkai da ki sur jingrwai, Kane ka la nang pynitynnad shuh shuh ïa ka tamasa bad khring ruh ïa shibun ki paidbah ban wan sakhi bad ïashim bynta ha kane ka Tamasa.
Haba ioh ban iakren bad u Director ka tnad Food Processing, u Bah Ian B. Saiborne, u la ong ba ka Meghalaya Pineapple Festival mynta u snem ka la long kaba jop bad kaba heh tam haduh mynta. U la ong ba ym tang u sohtrun ba la wanrah sha ka tamasa, hynrei la pyni ruh ia bun jait ki mar rep bad ki tiar ba la saiñ na ka jylla. U la bynrap ba ka jingwan paidbah kaba bun sha ka tamasa ka pyni shai ia ka jingkiew ka jingdawa ia u sohtrun Meghalaya, uba la pawnam kum u soh ba thiang tam.
Sa peit ruh
