Shillong, Naitung 16: Ki nongrep na ka thain Smit ha East Khasi Hills ryngkat ka seng Hill Famers Union (HFU) mynta ka sngi ki la sam paidbah syndon ia u jhur Kubi ha Shillong bad ban pynpaw sha ka sorkar ba ki nongrep Kubi ki la shah ktah jur palat na ka daw ka jinghiar dor u jhur Kubi haduh T. 2 shi kilo.
Ki nongialam ka HFU ha ka jingialam u Bah Commander Shangpliang bad u Secretary u Bah Alfonbith Kharasyntiew ryngkat ki dkhot bad ki nongrep mynta ka sngi ki la pynpoi haduh 3 pick-up u Kubi ha State Central Library ban sam paidbah noh ia u jhur Kubi sha ki paidbah nongleit nongwan ban pynpaw ka jingsngewkhia halor ka jingshah jur ki nonggrep na ka jinghiar dor u jhur Kubi.
Ki nongrep kiba la shah ktah jur bha ki kynthup sha ka thain Smit naduh ka shnong Mawpyrshong, Thynroit, Mawlali, Mawbere, Thangsning bad na kylleng ka thaiñ ba hap ha Mawkynrow bad Mawphlang Block.
Kumba la kren da u President bad Secretary ka HFU, laong ba kane ka jingsam paidbah ia u jhur Kubi ka dei ban pynpaw sha ka sorkar ba kan phai khmat lem sha ki nongrep kiba la shah ktah jur ha kaba ki hap bans iew ia ka ram ka shah ne kin kyrshan ia ka ing ka sem na ak jinghiar dor palat u jhur kubi.
Peit ruh:
Ki la ong ba ka seng ka dawa na ka sorkar ba ka dei ban thung syndon da ka Committee kyrpang ban peit halor kane ka jingshah ktah ki nongrep da ka bor sorkar bad ruh ban don kata ka Intervention Scheme khnang ba kan iarap ia kine ki nongrep kiba la shah ktah na ka jinghiar dor u kubi bad dei ruh ba leh lang ia baroh ki jaid jingrep jong ki nongrep, ki la bynrap.
