Jowai, Naitung 15: Haba kren sha ki lad pathaikhubor mynta ka sngi, ki nongialam ba rangbah jong ar-tylli ki kynhun sengbhalang na Ri Lum Jaintia, kiba kynthup ia u Bah Sambormi Lyngdoh, President ka Jaintia National Council (JNC) lem bad u Jersom Shylla, President ka Jaintia Student Union (JSU), ki la dawa na u Chief Executive Member (CEM) ka Jaintia Hills Autonomous District Council (JHADC), ba u dei ban weng noh mardor ia u Dolloi ka Elaka Nongkhlieh bad ruh ban weng noh ia ka No Objection Certificate (NOC) ba la dep ban ai sha ka Shree Cement, na bynta ban tei ia ka Karkhana pynmih Dewbilat hapoh ka Elaka Nongkhlieh.
Ki kyntien jingpynrem CEM bad ruh ban dawa leh eiei pyrshah ia u Dolloi bad ruh ban weng noh ia ka NOC ba la dep ai sha ka Shree Cement, na ki nongialam jong kitei ki arseng, ka dei hadien ba u CEM ka JHADC, u la ujor pynban da ka ejahar pyrshah ia ki nongialam ka JNC bad JSU, kata hadien ba ki la leit ban tur sha phyllaw ka ophisa treikam ka JHADC hynnin ka sngi.
Haba iadei bad ka jingiaid paidbah kaba hynin ka sngi, kitei ki nongialam, ki la ong ba ki la dep pan jingbit bad kiba la ong ruh ba ki don ia ka hok ban iakhih, hynrei ka jingkynthoh u CEM ba ka jingleit tur jong ki sha JHADC, ka la long pynban ka jingpyntieng pynsmiej ia ki nongtrei, ka dei kaba bakla shaba palat, namar ka jingthmy jingngi ka long ban iakhih da ka jingsuk, kata halor ka jingshah knieh ki jaka ki nongrep bad ki nongshong shnong ka Elaka Nongkhlieh khlem ka jingtip da ki trai jaka.
“Hato ka JHADC ka dei ka iing shimet u CEM? La ong kitei ki nongialam seng, kata ka dei hadien ba ki la sngewphylla, haba ki lap bad iohi ba u CEM bad ki EM ki la phet noh bad ka khang tala ia ka jaka rung sha JHADC, kata tang mar ia tip ba la poi ki nongialam bad dkhot jong kitei ki arsenal” ki la ong.
Namarkata, lyngba ka jingkren kaba mynta ka sngi, kitei ki nongialam arseng, ki la buhpor ba naduh 20 tarik mynta u bnai, ba u CEM um leh eiei, kata la ka long ba weng noh ia u Dolloi ne ban weng noh ia ka NOC ba la ai sha ka Shree Cement, na ka liang kitei ki seng kin shim da kiwei pat ki lynti bad ban bteng ia ka jingiakhih kaba kham jur, ki la bynrap.
