Nongpoh, Naitung 17: Ka jingbym shimkhia da ki briew ka tnat MeECL na Umiam bad kaba la wanrah ia ka jingduhei ia lai ngut ki mynsiem ba kordor jong ki heprit ha ka shnong Umtangling, kiba la shah bat bording hadien ba dkut u sainar Ilektrik, ka la pynlong ia u Damanbait Lamare, MLA Umroi, ba un leit dumok hi dalade ia ki ophisar kiba shong treikam ha ophis ka MeECL kaba don ha Umiam.
Katei ka jingleit kynduh u MLA Umroi ia ki ophisar MeECL ha Umiam, ka dei hadien ba u la wanphai na kaba leit sngewlem sha ki longiing kiba la ngat ha ka apot sngewsih ha Umtangling, kata ka dei ruh hadien ba ki briew na katei ka shnong, ki la iathuh ha u MLA, ba na ka liang ki briew shnong, ki la dep ban ujor halor ka jingbymshngain u sainar Ilektrik ha katei ka shnong, hynrei ym don ki briew ka MeECL, kiba la shimkhia, tad haduh ba ka la wanrah ia katei ka jingjia ba sngewsih.
Pule ruh:Ba hiar dor u Jhur Kubi haduh 2 tyngka shi kilo, hap sam paidbah ki nongrep ha Shillong
Ha ka jingiakren bad u Executive Engineer, kaba la donlang lem bad ki ophisar ka MeECL, u Damaanbait Lamare, u la ong ba kum kine ki jingjia kim dei shuh ban jia nangne shakhmat bad kum ki ophisar ki dei ban shimkhia mardor haba la don kiba la wan ujor, khlem da khein la ka ong ba ki shu ujor lyngba ka ktien ne khlem jingthoh.
“Lada ka tnat MeECL ka shimkhia noh mardor, kata hadien ba la don kiba la wan ujor, katei ka jingjia ba duhei ia ka mynsiem jong lai ngut ki heprit kan nym jia satia, hynrei ka jingbym shimkhia da ka tnat MeECL, ka sa wanrah ia katei ka jingjia ba sngewsih” kren u Damanbait ia ki ophisar MeECL.
Peit ruh:
Naduh mynta ka sngi, ym dei ban don shuh kiba kum kitei ki jingjia bad ki ophisar MeECL ruh ki dei ban burom bad ban burom ia ki paidbah, namar kumba ka long mynta, nga la ioh shibun ki jingujor na ki paidbah halor ka jinglehmeng bad ym shimkhia da ki ophisar ka MeECL, haba ki thmu kynduh ne ban iakren ia kino kino ki kam.
