Khliehriat, Naitung 25: Ka National People’s Party (NPP) mynta ka sngi Saitjaiñ, ka 25 tarik Naitung 2026, kala pynlong ïa ka jingïalang paidbah bad jingïalap elekshon na ka bynta ka MP By-Election jong ka Shillong Parliamentary Constituency ha Elaka Sutnga Dorbar Hall, East Jaiñtia Hills District. Kane ka jingïalang ka long ruh ka jingïalang paidbah kaba nyngkong eh jong ka party ha East Jaiñtia Hills na ka bynta kane ka elekshon MP.
Ha kane ka jingïalang la wan ban shim bynta da ka MLA ka Sutnga-Saipung, ka Kong Santa Mary Shylla, u Symbud Myntri Rangbah ka jylla, u Bah Sniawbhalang Dhar, u kyrtong ka NPP na ka bynta ka MP By-Election, u Dr. D.R.L. Nonglait; ki MDC jong ka NPP na Jaiñtia Hills Autonomous District Council (JHADC), u Dolloi, ki nongïalam ka party, ki riew rangbah, ki nongkyrshan, ki dkhot ka party ryngkat ki nongkyrshan na katei ka thaiñ.
Haba ai jingkren, u Dr. D.R.L. Nonglait u la ong ba shuwa ban rung sha ka NPP, u la ïakynduh ïa u Symbud Myntri Rangbah bad ruh ïa u Myntri Rangbah ka jylla ban ïakren halor ki mat kiba kongsan kiba donkam ban pynbeit ha Meghalaya bad ban ai jingmut ïa ki polisi kiba lah ban wanrah jingmyntoi ïa ka jylla. U la ong ba baroh arngut ki nongïalam ki la pdiang sngewbha ïa ki jingai jingmut jong u bad ki la pynshlur ïa u ban trei lang bad ka sorkar. Hadien bun sien ki jingïalang bad ki nongïalam ka NPP, u la rai ban pynïasoh bad ka party.
U Dr. Nonglait u la ong ba ka thong jong u ka long “Ban pynbha, ban pynshai bad ban tei.” U la pynpaw ba u wan na ka longïing kaba duk bad u ngeit skhem ba da ka jingïaishah bad ka thong, un ioh ka jingjop donburom. U la ong ruh ba kam dei na ka bynta ka jingïoh myntoi shimet ba u rung sha ka saiñ pyrthei, hynrei dei namar ka jingkwah ban shakri ïa ki paidbah bad ïa ka jylla. Watla u dang don ha ka kam sorkar bad u la jan poi sha ka por shongthait, hynrei u la rai ban ïakhun ïa kane ka MP By-Election na ka bynta ka jingbha jong ki paidbah.
Na ka liang u Symbud Myntri Rangbah, u Bah Sniawbhalang Dhar, u la ai jingïaroh ïa u Dr. Nonglait halor ki jingïoh kyrdan pule kiba bun jong u bad u la ong ba ka NPP ka sngewsarong ban ïoh ïa kum u briew uba don ka jingnang jingstad bad ka jingïaid lynti kaba bha. U la ong ba watla u Dr. Nonglait u la jan poi sha ka por shongthait na ka kam sorkar, hynrei u la shim ïa ka jingkitkhlieh ban rung sha ka saiñ pyrthei na ka bynta ka jingbha jong ka imlang sahlang. U la bynrap ruh ba ka kam saiñ pyrthei kam dei kaba suk ban rung.
U Bah Sniawbhalang Dhar u la ong ruh ba ha ka jingïaid lynti jong u ha ka saiñ pyrthei, ka Sutnga-Saipung Constituency ka dei tang ma ka kaba la ïoh ïa ka roi ka par bad ki projek kiba kot palat 400 klur. U la ong ba kane ka pisa kam dei kaba rit satia na ka bynta kawei ka constituency, bad ka long ka dak ba ka MLA ka Sutnga-Saipung ka la ïai buddien ïa ki kam pynroi, kaba la pynlong ïa ka sorkar ban wanrah bun ki projek ha kane ka thaiñ. U la ong ruh ba wat mynta dang don katto katne ki jaka ha Saipung kiba dang donkam shuh shuh ïa ka jingpynroi.
Peit ruh:
Ha ka jingkren jong ka, ka MLA ka Sutnga-Saipung, ka Kong Santa Mary Shylla, ka la ong ba naduh ba ka la shah jied kum ka MLA jong ka NPP, bun ki projek pynroi ki la wan sha ka constituency. Ka la ai jingïaroh ïa u Symbud Myntri Rangbah, u Bah Sniawbhalang Dhar, da kaba ong ba u dei u nongïalam uba kren khyndiat hynrei uba trei shitom bha bad u ba leh da ki kam. Ka la ong ruh ba palat 12 snem, bun ki shnong ha Sutnga-Saipung kim shym la ïoh ïa ki surok kiba biang, hynrei hapoh ka sorkar ba ïalam da ka NPP, ki kam pynroi ki paw man ka sngi.
Ka Kong Santa Mary Shylla ka la ai jingïaroh ruh ïa u Myntri Rangbah ka jylla, u Bah Conrad K. Sangma, halor ka jingtrei shitom jong u ban wanrah ïa ki song jingïarap na ka Sorkar Pdeng bad ban pyntyllun ïa ki kam pynroi ha Meghalaya. Ha kaba kut, ka la ai khublei ïa u Dr. D.R.L. Nonglait halor ka jingwan pynshai paidbah ha ka constituency jong ka bad ka la kyntu ïa ki paidbah ban ai ka jingkyrshan kaba pura ïa u ha kane ka MP By-Election.
