New Delhi, Naitung 25: Hadien ka jinghiar shuki u Dharmendra Pradhan, u Pralhad Joshi, Myntri ka sorkar pdeng ba dei khmih iaka tnad Consumer Affairs, Food and Public Distribution and New and Renewable Energy u la shimti noh iaka kam kum u Myntri ba thymmai ka tnad pule puthi jongka ri India.
Katei ka jingshimti u Pralhad Joshi ia katei ka kam myntri thymmai kadei hadien ba ka President jongka ri, ka Droupadi Murmu kala pdiang iaka shiti iehnoh kam u Dharmendra Pradhan katkum ka Article 75(2) jongka riti synshar ka ri. Naka liang u Myntri Rangbah ka Ri, u Narendra Modi ula bthah ia u Pralhad Joshi ba un shimti lang ia katei ka tnad pule puthi nalor kiwei de ki tnad kiba u bat kum u myntri jongka sorkar pdeng.
U Dharmendra Pradhan u la hap ban hiar shuki noh hadien ka jingjur jongka jingiakhih ha kylleng ka ri, khamtam ha Jantar Mantar jongka nongbah Delhi da ki samla pule, kaba la lam khmat da ka Cockroach Janta Party (CJP) halor ka jinglait tuh ki jingkylli ka eksamin NEET-UG, ban siew bailutksan iaki longing jong ki samla kiba la pyniap ialade bad ban pynkylla dur thymmai iaka pule puthi hapoh ka ri baroh kawei, nalor kiwei kiwei de ki jingdawa.
U Pralhad Joshi udei uwei na ki nongialam ba la ih bha jongka seng Bharatiya Janata Party (BJP) bad u la jop la san sien kynthih kum u MP na Dharwad Parliamentary Constituency jongka jylla Karnataka. La kha ia u haka 27 tarik u bnai Naiwieng jong u snem 1962 ha Bijapur kaba don mynta ha Karnataka bad sdang iaka kam sain hima sima da kaba pyniasoh bad ka Rashtriya Swayamsevak Sangh (RSS) ha ki snem 1990.
Hapdeng ki snem 2019 bad 2024, u Pralhad Joshi u la bat iaka kam myntri jongka ri haka tnad Parliamentary Affairs, Coal, and Mines bad hadien ka 2024 pat u la ioh ban bat iaka tnad Consumer Affairs, Food and Public Distribution and New and Renewable Energy.
Sa peit ruh
