Nongpoh, Naitung 26: “Ngi donkam ka jingiatrei lang ban pynduhjaid ia u Drok na ka imlang ka sahlang bad tang ka sorkar kan nym lah ban pynduhajaid ia u drok” ong u Bah David Lyngdoh, uba dei u Chairman ka Umsning People’s Front (UPF) haba leit ban pynhap pyrda ia ka Dr. David Lyngdoh 8-A-Side Futsal Tournament ba la pynlong ha SS Mint Sports Complex, Umsohlang ha ka thain Umsning ha Ri Bhoi District.
U la ong ruh ba ka Umsning People’s Front ka la pynlong ia kane ka Futsal Tournament ka long shi bynta ban ai mynsiem ia ki khun samla ba kin lait na shibun ki jingdih ba sniew khamtam u drok uba la pynjot ia kiba bun ki khun samla jong ka imlang ka sahlang.
Namarkata, u la ong ruh ba pynduhjaid ia baroh ki kam sniew, ki jingdih basniew bad khamtam u drok, ka dei ka kamram jong ki samla ban ia trei lang bad ka imlang ka sahlang, namar ban pynduhjaid ia u drok tang ka sorkar kan nym lah ban thaw pyrthei, hynrei donkam lang ka jingiatrei lang ki samla, ka imlang ka sahlang bad ki shnong ki thaw, u la bynrap.
Ha kane ka Futsal Tournament kaba ar sngi la wan ban shim bynta haduh 24 tylli ki kynhun ialehkai bad ia ka nam lahduh la rah da ka kynhun First Come first serve na Umsning kaba la ioh khur ia ka song pisa kaba T. 40 hajar bad ka Umran Dairy kum ka kynhun kaba wan ba ar ka la ioh khur ia ka song pisa kaba T. 20 hajar.
Peit ruh:
La sakhi lang ruh ha kane ka sngi da ka jingdon lang u Bah Dipshon Ryntathiang, u Bah Pateng Myrsing, President ka Confederation of Ri Bhoi People lem bad kiwei kiwei ki riew rangbah.
