Hadien ka jingsaphriang jong kawei ka dur khih (video) ha kaba la iohi ia ki katto ki shynrang ki la bom dusmon la kum ki ‘riewkhlaw ia kawei ka longkmie ha ri lum Garo, kaba la jia ha ka shnong Lower Teksagre jong ka Damal Asim Police Station jongka Dadengre, West Garo Hills District, hynnin ka Sngi U Blei pat sa kawei ka dur khih kaba iasyriem kumjuh na ka jylla West Bengal, ka saphriang ha kylleng jong ki lad pathai khubor bad rynsan social media.
Kane ka jingjia, kadei kaba la jia ha Chopra Block jong ka Uttar Dinajpur District ka jylla West Bengal, ha kaba lyngba katei ka durkhih kaba la saphriang, la iohi ia uwei u rangbah uba la shoh dusmon da ki kynja dieng ia kawei ka longkmie lem bad uwei u shynrang khlem jingsynei bad khlem jingmap halor ka jingsuba bad kynnoh ba ki don jingiaieid shabar jong ka shongkha shongman. Katkum katei ka durkhih kaba la shaphriang, la iohi ruh ba utei u runar ym tang ba u shoh da u kynja dieng, hynrei u la kynjat bad patrong ruh ia u shniuh jong katei ka longkmie hakhmat ka jingiadon lang jong kiba bun ki ‘riew paidbah kiba long tang kum ki nongpeitkai.
Na ka liang jong ki bor pulit ka Islampur Police Station tang mar ia iohi ia katei ka durkhih kaba la saphriang, ki la pynlong ia ka jingwadbniah ban pynthikna halor katei ka jingjia, bad hadien ka jingpynthikna, ki ujor ejahar bad pynlong ia ka jingthwet ban iohkem ia utei u runar uba donkti ban leh ia katei ka kam ‘riewkhlaw, la pyntip u Superintendent of Police ka Islampur District, u Joby Thomas K.
Hadien ka jingpynlong ia ka jingthwet kaba jur, ki bor pulit ki la ioh noh ban kem utei u briew uba suba donkti halor katei kam shoh ‘riewkhlaw ia katei ka longkmie bad uwei pat u shynrang. Utei u runar uba la shah kem noh ha ki bor pulit udei uba la tip kyrteng kum u Tajmul Haque bad uba la ju khot sin ruh kum u JCB. Na ka liang ki pulit rah noh ia utei u runar sha Islampur Police Station na ka bynta ban pynlong ia ka jingtohkit kaba bniah. La kynnoh ruh ba utei u Tajmul Haque udei nongialam ka seng Trinamool Congress bad uba iajan bha bad u MLA ka TMC na Chopra konstitwensi, u Hamidul Rahman.
Kum ban shu pynkynmaw biang, hadien ka jingsaphriang jong ka durkhih, ki bor pulit ka West Garo Hills District ha ka 26 tarik jong u bnai Jylliew, 2024 ki la ioh ban kem haduh hynriew ngut ki runar kiba la donkti ban shoh dusmon bad shoh ‘riewkhlaw ia kawei ka longkmie myn ha ka 25 tarik jong u bnai Jylliew, 2024. Uwei u rangbah u la mih shakhmat ban tem ia kane ka jingkhie wahleng kitei ki runar, hynrei u la shah khynniat pynban sharud katba da ki spah ngut kiwei pat ki paidbah nongshong shnong bad kynthup ruh wat ki longkmie, ki shu long pynban tang ki nongpeitkai khlem don satia ka mynsiem iarap ia katei ka longkmie. Kane ka jingjia ha West Garo Hills ruh la kynnoh ba kadei halor ka jingsuba don jingiadei jong katei ka longkmie bad uwei pat u shynrang shabar jong ka shongkha shongman.
