Nongpoh, Naitung 28: U Bah Renikton L. Tongkhar, MLA Mawkyrwat bad uba dei u trai ia ka jaka kaba don ha Pahamlang 17mer, Byrnihat, u la leit ban kynduh ia ki briew ha katei ka shnong, kata na bynta ban pynshai halor ka jingshah kynnoh, ba dei na ka jingpyntrei jong u ia ka jaka, kaba la wanrah ia ka jingshlei um ha katei ka shnong bad shah ktah bun tylli ki longiing.
Ha katei ka sngi, ba u Bah Renikton L. Tongkhar, u la leit ban kynduh jurip ia ka jaka bad kynduh ia ki briew ha katei ka shnong, la sakhi da ka jingdon ki bor Distrik Ri Bhoi, ki briew na ka tnat PWD, u Rangbah shnong lem bad ki paidbah jong katei ka shnong.
Ha ka jingkren bad ki briew shnong, u Bah Renikton, u la ong kren shai hakhmat jong ki, da kaba ong ba ki briew shnong hi ki la sakhi da la ki jong ki khmat, ba um pat pyndonkam eiei ruh em ia katei ka jaka jong u bad nalorkata ka dei ruh ka jaka kaba u dang shu dep thied na kiwei pat ki briew.
Pule ruh: Ka Sunrays SS Bad Synod SS Kum Ki Lahduh Haka Inter School Karate Ba 32 Ka AMKA
U la ong ruh, ba ki briew shnong ki sakhi hi da la ki jong ki khmat, ha kaba mar ia dep thied, u la pyrshang shwa ban shna bha ia ka lynti ban iaid ka um, khnang ba kan nym ktah ia ki paidbah ha katei ka shnong bad uba la kren ruh hakhmat ki paidbah, ba u la lut da ki phew lak tyngka, tang na bynta ban shna lynti ban iaid ka um.
“Phi ki paidbah jong katei ka shnong, phi tip hi ba mynshwa por ba nga thied ia kane ka jaka, ka dei ka jaka ba madan, hynrei na bynta ka bit ka biang ki paidbah, ngan ai sngewbha da kaba shna lynti iaid ka um ha jaka jongnga, kampher watla kan dei ka jingduhnong ianga, hynrei tang ban bit ban biang u paidbah” ong u Bah Renikton L. Tongkhar.
Peit ruh:
Namarkata, kumba kane ka jingpyntrei ia ka lynti iaid ka um bad thep ia ki Hume Pipe, ka dang iaid bad ba ka um ruh ka la ioh ban iaid, hynrei nag kyntu iaphi ki paidbah nongshong shnong, ba phi dei ban long kiba husiar bha ialade bad ia ki khun ki kti, namar lada jia ba ther u lapbah, katei ka jaka ba dang tih ka lah ban wan bad wanrah biang ia ka jingshlei um, u la bynrap.
