Plie U Bah Myntri Sorkar Ia Ka Weaving Centre Ba 1.17 Klur Ha Mawlong Ban Pynkhlain Ia Ki Kam Thain Jain Tynrai.

Nongpoh, Nailar 12: Ka kam thaiñ jaiñ tynrai ha Ri-Bhoi ka la ïoh sa kawei ka jingkyrshan lyngba ka jingplie paidbah ïa ka Mawlong Nongtluh Weaving Center ha shnong Mawlong Nongtluh mynta ka sngi.

Ïa kane ka jaka ai jinghikai bad kyntiew ïa ka kam thaiñ jaiñ la wan plie paidbah da u Myntri ka tnad Textile ka Sorkar Meghalaya, Bah Metbah Lyngdoh, ha ka jingdonlang u MLA ka Nongpoh, Bah Mayralborn Syiem, E. Marak, Assistant Commissioner Ri-Bhoi, Bah Wanlam Kupar Kharmudai, Deputy Project Manager, MBMA, Kong D. Tariang, District Handloom Officer, Ri-Bhoi, lem bad kiwei ki nongshah khot sngewbha.

Ka Mawlong Nongtluh Weaving Center ka dei kawei na ki projek ban ai jingkyrshan bad pynkupbor ïa ki nongthaiñ jaiñ ha katei ka thaiñ. Ïa ka center la tei da ka jinglut kaba kot sha ka T.1.17 klur, lyngba ka Meghalaya Basin Management Agency (MBMA), Ri-Bhoi District bad ka jingplie ïa katei ka Center ka long kum kawei ka sienjam ban pynïar ïa ki lad kamai bad ban kyntiew ïa ka kam thaiñ jaiñ tynrai, khamtam ïa ki longïing bad ki nongshong shnong jong ka thaiñ Mawlong Nongtluh bad ki sawdong sawkun.

Haba kren ha ka jingïalang, u MLA ka Nongpoh, Bah Mayralborn Syiem, u la pynpaw ïa ka jingsngewkmen halor ka jingplie ïa kane ka center, kaba un khmih lynti ba kan wanrah jingmyntoi kaba khraw ïa ki nongshong shnong, khamtam eh ïa kito kiba trei ha ka kam thaiñ jaiñ.

Pule ruh:Sdang ka KSU na Iew Mawkyrat ban ialap paidbah halor ki 5 tylli ki mat jingdawa na ka sorkar jylla

U Myntri ka tnad Textile, Bah Metbah Lyngdoh, u la ong ba ka jingplie ïa kane ka Weaving Center ka long shi bynta jong ka jingthmu jong ka Sorkar Jylla ban pynkupbor ïa ki nongthaiñ jaiñ bad ban ïada bad pynneh ïa ki rukom thaiñ jaiñ tynrai jong ka jylla.

U Myntri u khmih lynti ba kane ka center kan ym long tang ka jaka ai jinghikai, hynrei kan long ruh ka jaka ban pynïasoh ïa ki nongthaiñ bad ki lad jingïarap bapher bapher.

Peit ruh: 

U Bah Metbah Lyngdoh u la kyntu ruh ïa ki longkmie ba kin ïai bteng ban trei shitom ha kane ka kam, namar ki longkmie ki don ka bynta kaba khraw ban pynneh ïa ka rukom thaiñ jaiñ tynrai, u la ong ruh, Lyngba ka jingnoh synñiang jong ki, ka dustur bad ka rukom trei tynrai jong ki Khasi ka dang ïai neh bad ïaid shaphrang haduh mynta