Nongpoh, Nailar 13: Uwei u Home Guard u la duh noh ia la ka jingim hynnin ka janmiet hadien ba kawei ka Kali Pickup kaba don ia u number AS-25-EC-3468 kaba kit ia u Nar Post Electric ka Company Nezone ka la shah tynrah ha kawei ka Trok kaba don ia u number AS-01-FC-9640 ha ka lad kaba leit sha Narbong hajan ka surokbah National Highway-6 ha ka thain Byrnihat.
Ka jingkhlad une u Home Guard ka dei namar ka jinghap kitei ki nar post ilektrik kiba la ban ia u katba u dang don ha ka kamram ban pyniaid ia ki Kali haduh ba u la mynsaw jur.
Kane ka jingjia ka la jia ha ka por 6.35 baje janmiet ha kaba utei u Home Guard ba la tip kyrteng kum u Megellan Sohkhlet ba shong basah ha Pahamsohthri u dang don haka kamram ban pyniaid ia ki Kali, hynrei ka jinghap kynsan kitei ki nar post electric kaba la ban ia u ka la pynlong ia u ban mynsaw jur bad duh syndon ia la ka jingim.
La rah ruh ia une u Home guard mardor sha PHC Byrnihat ban ioh ia ka jingsumar, hyrnei namar ba la jur ka jingmynsaw hadien ba la poi ha katei ka jaka ai jingsumar ki Doctor ki la pyntip ba une u Home Guard u la dep khlad lypa na katei ka jingmynsaw.
Ka tyllong khubor na ki Pulit ka la ong ba utei u Dirbar ka Kali Pickup ba la tip kyrteng kum u Gandhi Kalita na Pachim Boragoan, ba hap ha Gorchuk Police Station, Kamrup (Metro), Assam u la phet krad ia lade na katei ka jingjia bad tang hadien khyndiat por u la wan pyndep hi da lade ha ki pulit ka Byrnihat Police Station.
Katei ka Trok pat kaba kit ia u Coke la niah da u John Paul Khardewsaw uba shong basah ha New Nongstoin bad kane ka jingjia ka la jai ruh ha ka por ba baroh kitei ki ar tylli ki Klai ki dang thmu ban wan sha Nongpoh.
peit ruh: https://youtu.be/G_56wAzHOB4?si=34usF1ZEOmNjfFVP
Halor kane ka jingjia, ki Pulit ki pynlong ia ka jingtohkit kiba dei katkum ki kyndon ain ha kane ka jingiatynrah Kali bad ki la leh ruh katkum ki kyndon ain shuwa ban aiti ia ka met u Home guard sha kiba haing ha sem na ka bynta ban leh burom khatduh ia ka met ba dang sah jong u.
