Ka seng Hynniewtrep National Youth Front (HNYF), Southern Border Area ka la pynpaw ia ka jingsngewkhia jur halor ka jingioh rung lait lan jong ki nong Bangladesh shapoh u pud u sam jong ka ri India lyngba ki khappud jong ka jylla Meghalaya.
U Kyllang Thongni bad u Bah Trimbor Mawlein, kiba dei President bad General Secretary ka HNYF Southern Border Area, ki la iathuh ba ka seng hadien ka jingbuddien, ka ioh jingtip ba ka jingioh rung jong ki nong Bangladesh shaka jylla lyngba ki khappud jong ka thain Dangar, Balat bad Ranikor, kadei ba ki don ki Dalal na ka jylla.
Kite ki nongialam seng, ki la ong ba ruh ba dei lyngba kine ki Dalal ba kitei ki nong Bangladesh ki ioh ban wan rung suk sha ka jylla bad ka ri India bad kum ka seng ka maham ia kine ki jaitbriew ba kim dei shuh ban mlien ia kine ki jait kam nangne shakhmat, bad lada jia ba ka seng ka lap, kan sa leh da kaba tyngeh.
Shuh shuh, kitei ki nongialam seng, kila kyrpad ruh sha ki bor sorkar bad kidei ban pynkhlain ia ka jingpahara ha kitei ki thain ban lap ia kitei ki Dalal kiba donkti bad ban pynshitom da kaba tyngeh.
