Shillong, Nailur 08: Ka jingwan tuid ki paidbah ba la kot da ki hajar na ka thain Mawkynrew ka la dang ai mynsiem shuh shuh ia u Dr. DRL Nonglait kum u kyrtong ka NPP ha kane ka election MP shiteng samoi na ka Shillong Parliamentary Constituency.
Ia kane ka jingwan tuid ki paidbah ban ai ia ka jingkyrshan ia u Dr. DRL Nonglait la sakhi ha ka jingialang kaba long hynnin ka sngi ha Mawkynrew.
Kaei kaba la ai mynsiem ia u Dr. DRL Nonglait ha kane ka jingialang ka long ba ki paidbah nongkyrshan hi ki la wan ban ia lum ban sngap ia ki nongrim jong u Dr. DRL Nonglait kum u kyrtong ka NPP bad ia kane ka jingialang ym shym la pynlong da ka party NPP bad ka dei ka jingialang kaba la pynlong hi da ki paidbah nongkyrshan na Mawkynrem kiba kyrshan ia u Dr. DRL Nonglait.
Ha kane ka sngi nalor u Dr. DRL Nonglait la don lang ruh ki nongialam ba hakhmat ka NPP ba kynthup ia u Bah Hamlet Dohlieng, u Bah HM Shangpliang bad nalor kata ki riew rangbah katei ka thain bad ki paidbah kiba la wan ban kyrshan ia u Dr. DRL Nonglait.
Haba kren ruh ha kane ka jingialang u Dr. DRL Nonglait u la pynpaw ia ka jingkmen kaba khraw halor ka jingmih hi ki paidbah ban wan wai jingkyrshan ia u bad kum u kyrtong ka NPP u khmih lynti ba ka jingwan tuid ki paidbah ban kyrshan kan long ka lynti ba un poi sha ka thong jong ka jingjop ha kane ka election MP shiteng samoi ban sa long ha ka jylla.
Peit ruh:
Nalor ki nongrim kiba u ju kren kum ka jingdawa ban pynrung ia ka ktien Khasi ha ka khyrnit ba phra ka riti synshar ka ri, ban kyntiew ia ki kam rep, ka pule ka puthi, u Dr. DRL Nonglait u la kular u la iaroh ruh ia katei ka thain Mawkynrew kaba dei kawei na ka thain kaba don ia ka jingitynnad ka mariang kum u Lum Rapleng bad kiwei. U la pan ruh ka jingkyrshan na ki paidbah ban pynjop ha kane ka election MP shiteng samoi, namar dei tang ki paidbah kiba lah ban pynkup bor ba un lah ban pynurlong ia shibun ki jingangnud kiba u thrang ban shakri na ka bynta ki paidbah ha ka jylla.
