Shillong, Nailur 17: U Symbut Myntri Rangbah ka Jylla ba khmih iaka tnat ka kam pohïing u Bah Prestone Tynsong ula kam ba ki Pulit ka Jylla kila biang pura ban tem iaki kam beain kum ka jingkawang petrol bad shah thang kali kaba dang iai bteng ha nongbah Shillong.
Ia kane u Bah Prestone ula jubab haba kylli, hato ka Jylla ka donkam ne em ban wanrah bor pahara ban tem iaki kam beain kiba dang iai bteng haduh mynta ha Nongbah Shillong.
Lah ban kdew ba tang hapoh kane ka taiew, kila don ki kam beain kum ka jingshah kawang petrol bom ki Police Station bad ki ophis Sorkar nalor ka jingshah thang ki kali.
Haba kren shaki lad pathai khubor u Bah Prestone ula ong “Ngim donkam bor pahara na bar ka Jylla. Ki Pulit ka Jylla kila biang palat ban tem ia kum kine ki kam beain”.
U Bah Prestone ula ong ba ula dep bthah ia ka Director General of Police (DGP) ban bthah iaki Pulit ban long kiba peitngor bad ban pynkhlain iaka jingiaid pahara haka por miet.
U la pyntip ruh baka Sorkar kala bthah iaki ophis treikam ban pynbun ka jingpyndait kor CCTV haki jaka ba i donkam tam khnang ban lap ia ki runnar kiba thmu ban leh iaki kam pyntriem.
Pule ruh:
“Nga kwah ban phah ka khyrwoh shaki paidbah ba ka Sorkar kan leh iaka ba donkam pyrshah ia ki runnar kiba leh ia kum kine ki kam beain. Nga phah ruh ka kyrwoh shaki runnar ba kidei ban sangeh mardor ban leh kum kine ki kam beain, ka ain kan thwet ia phi bad ka ain kan leh iaka ba donkam” ula ong.
