Ka jingthmu pyniasoh BJP, ioh mynsiem u Bah Kyrmen Shylla ba kyrshan ki nongialam bad ki nongkyrshan

Khliehriat, Nailur 16: Ka jingkhih win jong ka khubor ban pyniasoh BJP ki 8 ngut ki MLA ka UDP ha ka jylla bad ki la poi ruh shaduh u pud ban kynduh ia u Amit Shah ha Delhi kumba la mih ha ki lad pathai khubor ka la pynlong ruh wat ia u MLA ka Khliehriat Constituency u Bah Kyrmen Shylla ban hap ban lum ia ki nongialam bad ki nongkyrshan na ka bynta ban ia thir halor kane ka kam kaba u thmu ban pyniasoh noh sha ka party BJP.

Ia kane ka jingialang la pynlong ha ka ïingsah jong u ha Byndihati ha East Jaintia Hills ha kaba ki nongkyrshan bad ki nongialam ka UDP ki la wan poi lang nan ia kren ne iathir halor katei ka kam ban pyniasoh na ka UDP sha ka BJP party.

Kumba la sakhi mynta ka sngi, wat la u Bah Kyrmen Shylla um pat ai kano kano ka rai ba un pyniasoh sha ka BJP, hynrei lyngba ki jingkren ba la pynsgew sha paidbah ka la pynthikna ba ka don kata ka jingiakren ban pyniasoh sha ka BJP ryngkat kiwei ki MLA UDP kumba la paw pyrthei ha ka jylla na ka jingkynduh ia u Amit Shah ha Delhi.

Lyngba jong kane ka jingiakynduh lang nalor ki nongkyrshan kiba la kyrshan ia u ban pyniasoh sha ka BJP, ki nongialam ba paw kiba kyrshan ia kane ka jingthmu pyniasoh BJP ki kynthup ia Bah Joinlywell Pyrtuh, MDC barim ka KHADC, u MLA barim u Bah Justine Dkhar bad kynthup ki Rangbah Shnong, kiwei  kiwei ki nongialam bad ki nongkyrshan jong u.

Pule ruh: Ki Mad Jingdawa Ka UDP Na Ka Sorkar Pdeng, Ki Dei Ki Juh Hi Ki Mat Dawa Ki Paidbah ka Jylla: Hek

Kumba la pynpaw da u Bah Kyrmen Shylla ha ka jingkren, kawei na ka mat ba hakhmat eh kaba u kwah ban pyniasoh BJP ka dei ka jingkhang tih dewiong kaba la ktah bha ia ka kamai ka kajih, ka ioh kam ka ioh jam ha kaba lada ki pyniasoh BJP ka sorkar BJP kan shim khia ia kane ka mat nalor kiwei kiwei ki mat kiba donkam ha ka jylla.

Peit ruh:

Lyngba jong kane ka jingialang, wat la u Bah Kyrmen Shylla um pat pynthikna ba un pyniasoh BJP, hynrei lyngba ki jingkrem ki paw shynna ba u kwah ban pyniasoh sha ka BJP na ka bynta ka jingmyntoi ki paidbah bad kumba la sakhi hadien ba u la pynshai halor kata ka jingthmu ne ka jingiakren ban pyniasoh BJP ki nongialam bad ki nongkyrshan kim shym la pyrshah bad ki la ai mynsiem pynban ia u ban pyniasoh BJP na ka bynta ban weng ia ka jingeh ki paidbah khamtam ka jingkhang tih dewiong kaba la ktah bha ia ki paidbah ka Rilum Jaintia.