Nongpoh, Nailur 30: Ki nongioh jingmyntoi bad ka Secretary ka seng CSWO ka Kong Christabell Wanniang mynta ka sngi ki la leit syndon ban ia kynduh ia u Divisional Soil and water conservation officer ka Nongpoh na ka bynta ban pan jingshai halor ki jingkynnoh ba ki don ki jingbam sap na ki skhim ba pyntreikam katei ka tnat treikam ha ka shnong Lamalong ba hap ha Ri Bhoi District.
Kum ban pynkynmaw, dang shen ka seng CSWO ha ka jingialam ka Kong Christabell Wanniang kum ka Secretary ka la hiar sha ka Shnong Lamalong, kaba dei hadien ba ka la ioh iaka jingujor halor ka jingkynnoh bam sap ia ki skhim sorkar, ba ki nongioh jingmyntoi ki la ujor sha ka CSWO.
Ban pan jingshai halor kitei ki kam bam sap kaba la lap lyngba ka RTI, ka Kong Christabell Wanniang lem bad kito kiba ioh jingmyntoi ia ki khim mynta ka sngi ki la ia kynduh ia u Bah K. Synrem uba dei u Divisional Soil and Water Conservation na ka bynta ban iathir ne ia tai halor kitei ki jingkynnoh bam sap ia ki skhim ba pyntreikam ha ka Shnong Lamalong.
Ki ar ngut ki nongioh jingmyntoi na kitei ki skhim, ka Kong Lucky Kharnaior bad ka Kong Pynbiang Suphai ruh ki la pynpaw ba ka daw kaba la pynlong ia ki ban mih bad ban dawa ia ka hok, ka dei namar ba ka la don ka jingbam sap kaba shyrkhei kumba la lap da ka RTI, namar ka jingbam sap ka la sdang naduh u Rangbah shnong barim bad u Rangbah shnong ba thymmai ka shnong Lamalong ha kaba don kiba ioh pisa tang khyndiat bad don pat kiba ym pat ioh katba ia ka pisa pat la dep ban sei lut.
Ki la ong ruh ba kim pyrshah ia ki kam pynroi na wan rah sha ka shnong bad mynta ki mih ban pyrshah na ka daw ba ki kwah ba baroh kito kiba ioh jingmyntoi ki dei ban ioh ia la ka jong ka hok na katei ka skhim ba pyntrei ka tnad Soil and water conservation.
Ka Kong Christabell Wanniang kum ka Secretary ka CSWO ka la ong ba ka daw kaba la wan ban kynduh ia u Divisional Soil and Water Conversation Nongpoh, ka long ban pan jingshai bad ban ia thir sani halor kitei ki kam bam sap.
Ka la ong ruh ki la ia shong bad ia pyrkhat bha ban batai ha utei u ophisar halor kitei ki kam bam sap kumba la lap ha ka RTI bad ha kaba khatduh ki la dawa ban dei ban pynsangeh shwa ban pyntrei ia ki skhim katba baroh kito kiba ioh jingmyntoi kim pat ioh ia ka hok lane kim pat lah ban siew dep ia ka pisa kaba ki dei ban ioh kumba la mang ha katei ka skhim.
Ka la bynrap ruh ba ka seng CSWO bad ki nongioh jingmyntoi ki ai khublei ia u ophisar uba la sngap ia ki jingpynpaw halor kitei ki kam bam sap ba u la rai ban pynsangeh shuwa ia ki jingpyntreikam ia ki skhim bad ruh ba u la sngap ban pynlong da ka jingtohkit tad haduh ba kitei ki nongioh jingmyntoi ki dei ban ioh ia ka hok kumba la mang da ka sorkar.
Sa peit ruh
[…] Sa pule ruh: Ba Tuklar Ka CSWO, Yn Pynsangeh Ka Tnad Soil & Water Conservation Ïaki Kam Pynroi … […]