Nongpoh, Nailur 29: Ka Ri Bhoi Peoples Council (RBPC) ka la rai ban pyneh beit triang ban nym ailad ban pynlong ia ka eksamin thungkam jong ki Staff Nurse ha Ri Bhoi, lada ki bor pyniaid ka tnad ka koit ka khiah ki dang pdiang ia ki samla kiba na shabar ka Distsrict bad na kiwei kiwei ki bynta jong ka ri.
Kum ban pynkynmaw, dang shen ka RBPC ha ka 24 tarik u Nailur 2026 ka la leit ban pynsangeh ia ka eksamin thungkam ki staff nurse ha Ri Bhoi, kaba dei halor ka nongrim ba ha katei ka eksamin thungkam la bun da ki samla wad kam kiba na shabar ka District.
Ban buddien halor kane ka mat, ka RBPC mynta ka sngi ha ka jingialam u President u Bah Jason Lennox Nongrum ka la leit ban kynduh ia u Deputy Commissioner ka Ri Bhoi District u Dr. Abhishek Saini bad la aiti ruh ryngkat ka shithi ujor ban dawa ba ym dei ban ailad ia kiwei ki samla na kiwei ki District bad na kiwei ki bynta jong ka ri.
Haba ia kren bad ki nongthoh Khubor, President ka RBPC u Bah Janson Lennox Nongrum, u la ong ba ha ka jingiakren na ka liang u Deputy Commissioner bad na ka ophis ka DMHO ki la kyrpad ban shu ai noh da ki kynja corrigendum ban pyntip sha ki samla wad kam ba katei ka jinglait kam jong ki staff nurse kin shim kyrpang na Ri Bhoi, hynrei ka seng ia kane ruh ka kyntait.
Pule ruh: Risa Ki Paidbah Ba Wan Poi Ka Team India Bad West Indies Ha Guwahati Shwa Ka 2nd ODI Match
U la ong ruh ba ka seng ka la shim lyngab ka Notification lane ka Circular jong ka West Jaintia Hills kaba dei hi ka jingthungkam ia ki Staff Nurse bad la dep pynbna ba ki kyrtong ki dei ban long beit tang West Jaintia. Halor kane ka seng ka ban jur beit ba kajingthung kam ka dei ban tang ki samla na Ri Bhoi kiba don haduh 192 ngut ki kyrtong bad lada ki dang pdiang ia ki samla kiba na shabar ka District, ka seng kan pyrshah bad kan nym ailad ruh ban pynlong biang ia ka eksamin thungkam jong ki Staff Nurse ha MCH Ri Bhoi.
Shuh shuh, u la byrnap ruh da kaba ong ba hadien ba la pyni katkum ki Notification kumba la leh ha West Jaintia Hils na ka liang u Deputy Commissioner bad ka DMHO ki la pdaing ia ka jingai jingmut bad wat la katta ruh ka seng ka ieng beit ha ka nongrim ba dei ban thoh exam tang ki samla na Ri Bhoi.
Peit ruh:
U la bynrap ruh ba ka jingthungkam thung jam ka dei ban long kaba khuid kaba suba bad ka seng kan nym kwah kumba la jia ha West Khasi Hills ba la mih ka jingkynnoh ba don kata ka jingthong pisa bad na ka liang ka seng ka ailad beit tang ia ki samla kiba dei na Ri Bhoi bad ruh kito ki samla kiba don hok ban ioh katkum ka jinglah jongki ha ki eksamin thungkam.
