Baghmara, Naitung 04: Ka jingtwa khyndew kaba jur bha mynta ka sngi ka la jia hapdeng jong ka sor Baghmara, ha kaba la wan rah ka jingjulor jong kawei ka skul bad bun tylli ki dukan.
Kane ka jingjia jong ka jingtwa khyndew ka la jia mynta ka sngi, ha ka por bym poi pyrkhat, ba ka khyndew ka la twa kynsan tad haduh ba la pynjulor ia kawei ka skul bad ruh ki dukan jong ki nongshong shnong ha Baghmara.
Kumba la ioh lum jingtip, wat ka State Bank of India, ruh ka don hapdeng ka jingma, namar ka don hajan jong katei ka jaka twa khyndew kaba jur.
La ong ruh na ka daw kane ka jingtwa khyndew kaba jur, ka la wan rah ruh ka jingpynjot kaba khraw ia ka sor Baghmara kum ka sor pdeng ha South Garo Hills.
Shuh shuh, la ong ruh, ki bor shnong bad ki bor sorkar, ki dang pynlong ia ka jingtohkit halor ka jingduh kaba khraw ia kito kiba la shah ktah na kane ka jingtwa khyndew bad ki la thaw ruh ka lad ka lynti ban shngain ki nongshong shnong ban nym jia kano kano ka jingjia ba sngewsih ia ki paidbah nongshong shnong na kane ka jingtwa kynsan ka khyndew bah.
