Hadien bun snem bala sahteng ka kam ban jied ïaki nongïalam ba thymmai ka kynhun jong ki nongthoh khubor hapoh ka shatri jong ka Shillong Shillong Press Club, ka Directorate of Information and Public Relation mynta ka sngi kala lah ban pynlong ïaka elekshon ban jied ïa ki nongïalam ba thymmai jong u snem 2024-27.
Ïa katei ka elekshon ban jied ïaki nongïalam ba thymmai la pynlong ha Shillong Press Club kaba don ha Lower Lachumier bala wan ruh ban shim bynta da ki nongthoh khubor ka jylla kiba la wan ban shim bynta haka jingthep vote lyngba ki Postal Balot.
Ha kaba ïadei bad ka Post President ki don 3 ngut ki kyrtong kiba ïakhun, ba kynthup ïa u Bah Deimaia L Siangshai, Bah Joe Thangkhiew bad u Bah Raphael Warjri bad hadien ka jingñiew ïaki vote u Bah Deimaia L Siangshai u la shah jied kum u nongïalam ba thymmai ka Shillong PresS Club hadien ba u la ioh haduh 91 vote, katba u Bah Joe Thangkhiew u la ioh 67 vote bad u Bah Raphael Warjri u la ioh tang 6 votes.
Haba ïadei bad ka post General Secretary u Bah Savio Diengdoh u la shah jied khlem don ba ïakhun pyrshah.
Katba haka post Treasurer, ki don 2 ngut ki kyrtong ba kynthup ïa u Bah Gershome Hat bad u Martin Nongkhlaw, bad u Bah Gershome Hat u la shah jied ban long kum u Treasurer hadien ba u la ioh haduh 113 votes katba u Bah Martin Nongkhlaw u la ioh tang 50 votes.
U Malthus S Sangma Director ka Information and Public Relation u la ai ka jingkhublei ba kyrpang ïa baroh ki nongthoh khubor ka jylla hadien bun snem ka jingangnud ban pynthymmai biang ïaka kynhun jong ka Shillong Press Club hynrei katei kala urlong noh mynta ka sngi, hadien ka jingïaid beit ïaid ryntih jong ka jingthep vote kaba la sdang naduh ka por 10 baje mynstep haduh ka por 4 baje janmiet bad kyrmen skhem ba katei ka kynhun kan ai ka jingshakri ba paka naka bynta ka kynhun ki nongthoh khubor haka jylla.
Naka liang ki nongïalam bala shah jied thymmai jong ka Shillong Press Club naduh u Bah Deimaia L Siangshai kum u President, Bah Savio Diengdoh General Secretary bad u Bah Gershome Hat Treasurer haba kren ha katei ka sngi hadien ka bala dep ka jingñiew vote kila pynpaw ka jingsngew kmen kaba khraw hadien ba ki nongthoh khubor ka jylla kila shañiah haki ban ïalam ïaka kynhun jong ka Shillong Press Club bad kular ruh ban shimkhia ban pynurlong shibun ki mat kiba dei naka bynta ka bha ka miat jong ki nongthoh khubor haka jylla.
