Ka wei ka mei ïeid bala 76 snem ka rta naka shnong Diwon, Ri-Bhoi District ka la jah nala iing mynta la kumba 2 sngi naduh ka 8 tarik mynta u bnai hadien ba ka la mih nala iing bad khlem wan phai shuh.
Katei ka mei ïeid ka dei bala tip kyrteng kum ka Phip Lyngdoh 76 snem bad ka la mih nala iing haka por 10 baje mynstep jong ka 8 tarik Naitung bad haduh mynta ka khlem wan phai iing kaba la buh ïaki bahaiing hasem haka umdum, watla naka liang jong ki kila pyrshang ban wad bad pyntip ruh sha ki bor shnong.
U Bah Sterling Khymdeit Secretary Shnong ka shnong Diwon, u la ïathuh ba mar sien ïoh ïa kane ka jingtip, hynnin baroh shi sngi ki la pynlong ïaka jingwad shnong sha baroh ki jaka shnong bad ki khlaw kiba ka ju smat ban leit hynrei haduh mynta kim shym pat lap satia.
U la ïathuh ruh ba mynta ka sngi ka 10 tarik Naitung, ki dang ïa pyrshang ban leit wad ïa i, lada kim lap ha kane ka sngi, kin sa leit ban ujor da ka ejahar sha ka bor ki pulit.
Katkum ka jingïathuh ka khun jong katei ka mei ieid ka kong Them Lyngdoh, ka la ong ba ka kmie jong ka, ka dei kaba don jingpang mynta la 4 snem eiei, bad kaba ju smat ban mih na ïing bad wan phai pat hadien katto katne kynta, hynrei haka step jong ka 8 tarik Naitung kala mih na ïing ha kapor 10 baje mynstep bad kam shym la wan phai ïing shuh haduh mynta.
Kala ïathuh ruh, ha kapor ba ba mih na ïing ka phong ïaka jaiñ kyrshah rong blue bad ka sopti rong lieh bad kum ki bahaiing hasem kila kyrpad sha ki paidbah ba lada ki iohi ne lap kin pyntip sha ki bahaiing ne ki bor shnong.
