U Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, mynta ka sngi u la ai por ia ka Hima Sohra bad ki dkhot jong Executive Committee, ba ki dei ban wanrah lut ia baroh ki kot dulir jaka, ki ba ki la ai sha ki bym dei ki trai jylla ha Majai hapoh ka 15 tarik mynta u bnai Naitung, 2024.
Ia kane u Bah Pyniaid u la jubab ha ka Zero Hour Notice ka ba la wanrah da u MDC ka Mawthadraishan u bah Jambor War hapoh ka dorbar jong ka KHADC ka ba la sdang mynta ka sngi ha nongbah Shillong.
Haba kren ha dorbar u CEM u la pynshai halor ka jingpyrshah ki khun ki hajar ka Hima Sohra, kaba dei na ka daw jong ka jingpynkhie im biang ka District Council ia ka Notification 2019 ka ba ai jingithuh Raid ia ka Majai.
U Bah Pyniaid u la ong ba ka jingpynkhie im biang ia kane ka Notification ka long ban pynskem ia ka nongshynshar ban iada ia ka khyndew ka shyiap ha Majai bad ka jingshim rai ka Council ban ithuh Raid ia ka Majai kam dei ban ai bor iaka, namar ba kan hap hapoh ka shynshar ka khadar jong ka Hima Sohra.
U la ong ruh ba kane ka jingai jingithuh Raid ia ka Majai ka dei ka sienjam ba la shim hadien ba la ioh shibun ki jingujor halor ka jingbym iaid beit ka shynshar khada, namar dang ha ka 27 tarik Naitung jong u snem 2023, ka Council ka la ioh pdiang ia ka jingujor halor ka jingai No Objection Certificate (NOC) ka ophis jong ka Sohra Syiemship ia u Chairman ka shnong Naya Basti, u bym dei satia u Khasi.
“Kane ka dei ka bym lah pdiang, namar ha ka shynshar khadar u Khasi ym ju lah ban ai jingithuh ia ki nongialam shnong ki bym dei ki Khasi. Nalor kane, ha u snem 2020, ka Council ka la ioh jingujor halor ka jingsuba ai dulir jaka ia uwei u bym dei u Khasi ha Majai bad ki ba bun ki jingtip ba ka Council ka la ioh halor ka jingai khyndew ha Majai sha ki bym dei ki Khasi” la ong u Bah Pyniaid.
Utei u nongialam ka KHADC u la ong ruh kumba long haduh mynta, na ka liang ka Council kam pat ju ioh jingujor satia ba ka Majai ka ai khyndew sha ki briew bym dei ki Khasi, hynrei dei tang ka Hima Sohra ka ba ai ia ki jaka sha ki bym dei ki Khasi. Kumta ka Council kala shim ia ka rai ban pynkhie im biang ia ka Notification 2019 khnang ban teh lakam ia ka jingleh mon ki nongshynshar ka Hima Sohra.
“Halor ka jingpyrshah ban ai jingithuh Raid ia ka Majai da ki khun ki hajar ka Hima Sohra ka Council kan sa shong da ka jingialang ban bishar ia kane ka bynta, hynrei ngin ai ka rai ka ba biang tam bad ka ban ym ktah iano iano ruh” la ong u Bah Pyniaid.
