Ha kawei ka jingjia ba sngewsih u wei u samla ba dang 26 snem ka rta u la duh noh ïala ka jingim hadien ba u la shah thombor ha ki hati khlaw haka shnong Jolgaongre kaba hap ha South West Garo Hills District.
U u samla u ba la duh noh ïala ka jingim u dei u ba la tip kyrteng kum u Rikrak S Sangma (26) ba dei ruh u khun jong u Meckenson Ch Marak.
Katkum ka khubor bala ioh lum la ong ba katei ka jingjia kala jia hynnin ka miet haka por ba utei u samla u la pyrshang ban beh ïaki hati khlaw kiba la thmu ban pynjot ïaki jingthung jingtep bad ban ïada ïaki mar rep, hynrei ki hati kila thombor pynban haduh ba un da khlad noh na kane ka sla pyrthei.
Ki bor shnong tang hadien ka jingioh jingtip halor katei ka jingjia kila leit mar mar sha katei ka jaka ban pynlong ka jingtohkit hynrei la lap pynban ïaka met jong utei u samla u ba la khlad noh ha katei ka jaka.
