Ha ka jingiatrei lang ban khynra naphang ia ki kynhun kiba don kti ha ki kam khaïi Drok ha South West Garo Hills, ka kynhun Anti-Narcotic Task Force ki la ioh ban kem ia 3 ngut ki suba don kti bad ruh ki kynja drok ryngkat kiwei kiwei ki tiar ba pyndonkam da kitei kynhun khaïi Drok.
Kane ka jingioh ban kurup drok, ka dei ka jingiatrei lang ban pynlong ia ka jingkhynra ha ka 14 tarik u Naiung 2024 da ka Anti-Narcotic Task Force, ba la ialam da u Deputy Superintendent of Police ka South West Garo Hills bad ruh ba la ia trei lang da ki bor pulit ka Monabari Outpost (OP) bad Garobadha Outpost Guard Camp (OGC), ha ka thain Borkona area u jong ka Monabari Police Outpost ba hap ha ka Ampati Police Station.
Katkum ka tyllong khubor ba la ioh lum, la ong ba ha kane ka jingleit khynra, kitei ki kynhun Pulit ki la ioh kem ia ki 3 ngut ba suba don kti ha kane ka kam khaïi Drok, kiba kynthup ia u Mostafa Sheik, 24 snem ka rta, u Meter Ali, 32snem ka rta bad u Nur Abdin, 24 snem ka rta, kiba dei na ka jylla Assam.
La ong ruh, hadien ba la ioh kem ia kitei ki 3 ngut la ioh ruh ban kurup na kitei ki nongkhaïi drok haduh 11,000 tylli ki kynja dawai kuli ba la tip kum kita ki Methamphetamine tablets (Yaba), ba la khia 1.06 kilograms, 3 tylli ki Mobile Phone, 2 tylli ki Motorcycle bad kawei ka tari.
Ki bor pulit ka South West Garo Hills, hadien ka jingtohkit bad ka jingioh kurup ia ki tiar, ki la register case pyrshah ruh ia kitei ki suba nongkhaïi drok ha Ampati Police Station da kaba pyngngat kyndon ha ka Narcotic Drugs and Psychotropic Substances (NDPS) Act, bad ka jingtohkit halor kane ka jingioh kurup drok ka dang iaid shakhmat.
Shuh shuh, na ka liang ki bor pulit ka South West Garo Hills, ki la buh ruh ia ka jingkyrpad sha ki paidbah ka South West Garo Hills ban iasnoh kti lang ha kaba iakhun pyrshah ia ki kam khaïi Drok, kaba la ktah ia ka imlang ka sahlang bad ha kajuh ka por ruh ki la pynpaw ba katei ka jingioh kurup drok ka dei ka jingjop bad ka jingdang bteng ban ia khun pyrshah ia ki kam khaïi drok beaiñ, khnang ban wan rah ia ka shongsuk shongsain ki paidbah bad ruh kum ka thong ba ia khun pyrshah ia ki kam khaïi drok beain ha katei ka District.
