Ka jingkilanmet kaba 16 hapdeng ki shipai jong ka ri India bad Mongolia ba shisien shisnem kaba la tip kum ka Nomadic Elephant kaba 14 sngi lynter kaba la sdang naduh ka 3 tarik u bnai Naitung, 2024 ha ka jaka ai jinghikai jong ki shipai India kaba don ha Umroi, Ri Bhoi District kala poi noh sha kaba kut bad pynhap pyrda noh mynta ka sngi 16 tarik Naitung 2024.
Ka kynhun shipai ba 45 ngut na ka Sikkim Scouts lem bad kiwei kiwei de ki shipai ki la wan ban iashim bynta ha kane ka jingiakilanmet, katba na ka liang jong ka ri Mongolia, la mihkhmat da ki shipai naka 150 Quick Reaction Force Battalion.
Ka jingthmu jong kane ka jingiakilanmet hapdeng kine ki ar tylli ki kynhun shipai jong ka ri India bad Mongolia, ka dei halor kumno ban pynkhlain ia ka rukom treikam ka jong ki, ban ia sam mar kylliang ia ki buit treikam kiba ki don, da kaba phaikhmat kyrpang ha ki rukom iakhun pyrshah ia ki nongshun ha ki jaka kiba long khap sor bad kiba long lum, katkum ka Chapter VII jong ka United Nations.
Ha kane ka jingpynkut ïa katei ka jingkilan met la wan ruh ban shim bynta da u Maj Gen Ganbyamba Sunrev, Chief of General Staff jong ka Mongolian Armed Forces, bad u Lt Gen Zubin A Minwalla, jong ka Trishakti Corps ryngkat ka jingpyninam ïaki tiar ïaleh katkum ka juk mynta.
Haba pynkut noh ïa katei ka jingkilan, ki nongïalam na ki ar tylli ki ri ki la ïakren ban dang pynkhlaiñ ïaka jingïatreilang da kaba pynpaw ruh ïa ka jingïadei kaba kham jylliew bad ka jingburom iwei ïa iwei pat naduh ba sdang ka jingkilan bad kane ka pynpaw ïaka jingshaniah bad ka jingiatreilang naka bynta ban ïada ïaka ri naki nongshun bad pynkhlaiñ ïaka jinglong paralok.
Ka kynhun shipai India ka la pyni ruh ia ki tiar ialeh bad ki tiar kiba thymmai tam katkum ka juk mynta bad kane ka pynpaw ruh ïaka jingkiew ha ka liang ka teknoloji hapoh ka thong jong ka Atmanirbhar Bharat, kaba pynskhem ïa ka jingnang jingstad jong ka India ban ïada naki nongshun.
