“Ki Seng bhalang ha ka jylla ki dei ban long ka sur ne ka jingkieng ban rah ia kino kino ki jingeh jong ki paidbah sha ka sorkar: ong U Professor Kamailang Nongmalieh, Assistant Professor ka Sohra Government College, haba kren kum u kongsan ha ka jingrakhe dap shi snem ka seng Ri Bhoi People Councils’ (RBPC) ba la pynlong mynta ka sngi ha Dorbar Hall, Sajer ha Nongpoh.
U la ong ruh kam long kaba bakla ban don bun ki seng bhalang ha ka jylla, hynrei ka jingdon jong ki seng bhalang ha ka jylla, ka dei ban don jingmut bad kum ki seng bhalang ki hap ban phai khmat sha ki jingeh ki paidbah bad ban tip ruh ia ka jingeh ki paidbah na ka bynta ban pun jingkieng ban pynsngew ia ka sur jong ki paidbah sha ka sorkar.
“Ki don ruh ki seng bhalang kiba pyrshang ban shim ia kino kino ki mat (Issues) ha ka jylla da kaba shu jied tang ban ai jingmyntoi iano iano re iano, hynrei kum ki seng bhalang haba ki shim ia kino kino ki mat, ki dei ban long kita ki mat kiba ai jingmyntoi ia ki paidbah bad ki hap ban pynsngew sha ka sokar, ba ka sorkar ka dei ban shim khia na ka bynta ban thaw ia ki lad ki lynti ban weng ia ki jingeh jong ki paidbah” ong u Professor Kamailang Nongmalieh, bad bynrap ruh da kaba ong, ba lada ki seng bhalang kim leit sha u paidbah da kaba tih bniah ia ki jingeh jong ki, kumno kein kin tip ia ki jingeh jong ki paidbah” u la bynrap.
Kum ki nuksa kiba u la ai, ki nongialam ki dei ba leit sha ki nongrep bad kylli kaei ka jingeh jong ki nongrep, namar kumba long mynta ia ki mar rep la buh dor da ki nongkhaïi bad ym da ki nongrep, kane ka dei kawei na ka mat kaba ki nongrep ha ka jylla ki ia kynduh jingeh. Haba ia dei bad ka jingeh ki khynnah skul, ki seng bhalang ki dei ruh ban ia kynduh ia ki khynnah skul, khnang ba kin tip ia ki jingeh jongki bad ruh ba kin rah ia ka khubor sha ka sorkar kumno ban phai khmat kyrpang sha ki khynnah skul.
U la ong ruh kum ka Ri Bhoi District, kaba dei kawei na ka District ba dang sahdien ba la tip ruh kum ka ‘Aspirational District’, kane ka District ka donkam ia ki nongialam, ki seng bhalang ban long kum kita ki nongtied baje na ka sur ban rah ia ki jingeh jong ki paidbah la ka long ha ka District ne ha ka jylla hi baroh kawei. Ki riew shimet kin nym lah ban pynpoi ia ka sur jongki sha ka sorkar bad dei ki seng bhalang ban lum ia ka jingeh ki paidbah ban rah sha ka sorkar bad ruh kum ki seng bhalang ki dei ban long kita ki shipai ban iakhun ia ka jingeh ki paidbah kumba u Tirot Sing, u dei u syiem bakhraw uba la iakhun pyrshah ia ki shipai phareng na ka bynta ka jinglaitluid jong ka jaid byrniew kumba la rakhe ia ka jingdap 189 snem ka lyngkhuh sngi iap u Syiem Tirot Sing, u la ong.
Shuh shuh, kum ka jingai mynsiem ia ki nongialam bad ki dkhot kane ka seng, u Professor Kamailang Nongmalieh, u la ai mynsiem ia ki nongialam ba ki dei ban shim ia kita ki mat ki jura kiba ktah ia u paidbah bad kum ki seng bhalang kim dei ban long kita ki nongialam tang ban ioh jingmyntoi shimet, hynrei ki dei ban kren ne iakhun pyrshah ia kino kino ki mat ki jura kiba ai jingmyntoi ia u paidbah.
Ha kane ka sngi, la ai jingkren ruh da u President ka RBPC, U Bah Jayson Lennox Nongrum, uba la maitphang ia ka jingiaid lynti ba shisnem ka seng ha kaba shakri sha ki paidbah ka Ri Bhoi bad kum ka seng ka dang donkam ruh ia ki jingai jingmut bad ki jingkyrshan jong ki paidbah, khnang ba kan lah ban ai ka jingshakri kaba paka na ka bynta ka jingmyntoi jong ki paidbah, u la ong.
Kiwei kiwei kiba la ai jingkren ki kynthup ia u Bah Rocky Marwein, u Bah Rocky Kylla, bad u Bah Augustine Wahlang, ha kaba kum ki riew rangbah, ki la dang ai mynsiem ia kane ka seng ba ka dei ban shakri na ka bynta ban kyntiew ia ka Ri Bhoi bad ruh ha ka jylla hi baroh kawei.
La pynkut ia kane ka jingrakhe dap shisnem ka seng, da kaba pynlong ia ka jingot cake bad ruh ka jingpynlait paidbah ia ka riti treikam ka seng bad ruh ka jingrwai jong ka seng, kaba long ka dak ka jingrakhe dap shisnem ba kane ka seng ka la shakri ha Ri Bhoi, ba kum ka seng ruh kan dang bteng ka jingshakri halor kiba bun ki Nongrim ban ai ka jingshakri kaba paka sha ki paidbah ka Ri Bhoi.
