Ka Myntri ba peit ia ka tnad ka koit ka khiah ka sorkar Meghalaya, ka kong Ampareen Lyngdoh ka la pyntip ba ka tnad ka la pynkiew 4 percent ia ka tulop jong ki nongtrei 108 Emergency hapoh ka Jylla.
Ka Kong Ampareen kala iathuh ba ia kane ka rai la shim hadien ka jingiasyllok kaba bniah bad ka national health mission (NHM) kaba la mynjur ban soi biang ia ka kontrak jong ki nongtrei 108 hapoh ka Jylla.
“Namar ba ki nongtrei 108 ki la iasoi ia ka jingiateh kaba shisnem bad ka NHM, kine ki jingiateh ki hap ban pynthymmai biang. Ka dei ka jingiateh kaba shisnem, kumta ngi la hap ban pynthymmai ia kine ki jingiateh bad baroh ki nongtrei, kynthup ia ka jingpynkiew da 4 percent iaka tulop jong ki” la ong ka Kong Ampareen.
Nalor kane, ka Myntri ka tnat ka koit ka khiah, kala iathuh ba nalor ka jingkiew tulop, ka tnat ka peit ruh iaka bha ka miat ki nongtrei ki 108 da kaba pyntreikam ia ka jingiarap pisa kaba mardor ha ka por aksiden, shuti kha khun, nalor kiwei pat ki jingmyntoi na ka bynta ki nongtrei.
