Wat hapdeng ka jingshah khot iakren ha u myntri rangbah ka jylla u Conrad K Sangma, ka Khasi Student Union (KSU) ka la pynbna ban bteng ia ka jingkhynra ia ki kot ki sla jong baroh ki nongbylla bylla bar Jylla ha kylleng ka thain Khasi-Jaintia.
Lah ban kdew ba naduh ka 6 tarik Jylliew, ka KSU ka la sdang ban buh ia ki khyrdop talasi Inner Line Permit (ILP) ha ki saw tylli ki district jong ka jylla Meghalaya bad kala pynjur ia ka jingkhynra ia ki kot ki sla jong baroh ki nongbylla sngi bad naka liang u myntri rangbah ka jylla u Conrad K Sangma hynne ka sngi ka 19 tarik u la khot ia ki nongialam ba ha khlieh duh jong ka ka seng KSU ban iakren.
Haba kren sha ki lad pathai khubor u president ka KSU u samla Lambokstarwell Marngar u la ong ba ha katei ka jingialang ka seng ka la ai jingmut ia u myntri rangbah ka jylla ban pyntreikam noh ia ka Interstate Migrant Workmen Act 1979, kaba la pynkylla ha u snem 2011.
U samla Lambokstarwell u la iathuh ruh ba ha u snem 2020 ka Sorkar ka la wanrah ia ka Work Permit Act bad ha ka jingialang, ka seng ka la ai jingmut ban pynkhlain ia kane ka ain da kaba pynrung ia ki kyndon jong ka ain jong ka sorkar pdeng.
“Ngim lah ban len, ba ka jingïakynduh bad u myntri rangbah kam long kaba seisoh, namar u Myntri Rangbah ula pyntip baka sorkar jylla kan eksamin iaki jingai jingmut bad jingdawa ka seng. Namar kata ka KSU kan dang pynjur shuh shuh ïa ka jingkhynra ïa ki kot ki sla jong baroh ki nongbylla bar Jylla ha rilum Khasi-Jaiñtia” la ong u samla Lambokstarwell.
U samla Lambokstarwell ula ong baka KSU ka ieng skhem ha ka nongrim ba katba ia ka Inner Line Permit (ILP) ym pat ai jingmynjur daka sorkar pdeng, ka sorkar jylla ka dei ban pyntreikam ia ka Meghalaya Residents Safety and Security Act, ban peitngor iaka jingwan buhai shnong ki bar Jylla.
